Bu gün 27.09.2020-ci ildə başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri Allahverdizadə Elnur Əli oğlunun şəhadətə ucaldığı gündür.
 Sumqayit.tv xəbər verir ki, şəhidimizin anımmərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb. Mərasimdə İcra Hakimiyyətinin nümayəndələri, Zəngilan rayonu 19, 9 və 41 nömrəli məktəbin müəllim kollektivi, şəhidimizin təhsil aldığı Bakı Slavyan Universitetinin rektoru Anar Nağıyev və müəllim kollektivi, qohumlar və şəhid ailələri iştirak ediblər.
Xatırladaq ki, Elnur Əli oğlu Allahverdizadə 1995-ci ildə Sumqayıt şəhərində anadan olub. Əslən Zəngilan rayonundandır. 2016-cı ildə Bakı Slavyan Universitetinin Tərcümə fakültəsini çex dili ixtisası üzrə bitirib. Hərbi xidmətdən geri döndükdən sonra səs rejissoru kimi fəaliyyət göstərib. “Barama" və "Atılmışlar” serialları, bir çox reklam çarxlarının səs rejissoru olub. Xüsusilə, "Son iclas" bədii filminin bum operatoru, "Buğlama" komediya serialının səs operatoru kimi çalışıb. "Picmus production”un əməkdaşı olaraq fəaliyyət göstərib. Elnur Allahverdizadə 2016-2017-ci illərdə Azərbaycan Silahlı Qüvvələrinin sıralarında müddətli həqiqi hərbi xidmət etmişdir. Hərbi xidmət müddəti bitdikdən sonra mülki şəxs olaraq fəaliyyətini davam etdirmişdir. 29.09.2020-ci il tarixindən Səfərbərlik və Hərbi Xidmətə Çağırış üzrə Dövlət Xidmətinin Sumqayıt şöbəsindən Vətən müharibəsinə yollanmışdır.
Azərbaycan Ordusunun əsgəri olan Elnur Allahverdizadə 27.09.2020-ci ildə Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsində könüllü topçu olaraq iştirak etmişdir. Ağdamın və Xocavəndin azadlığı uğrunda gedən döyüşlərdə vuruşmuşdur. Elnur Allahverdizadə 07.11.2020-ci il tarixində Ağcabədi rayonunun Yuxarı Qiyaməddinli kəndi istiqamətində döyüş tapşırığının yerinə yetirilməsi zaman qəhrəmancasına şəhidlik məqamına ucalmışdır.
Azərbaycan Prezidenti İlham Əliyevin Sərəncamına əsasən Allahverdizadə Elnur ölümündən sonra, "Xocavəndin azad olunmasına görə", "Vətən uğrunda" və "Cəsur döyüşçü" medalları ilə təltif edilib. 
Allah ruhunu şad etsin, İgid! 

Müxbir:Vəsiqə DADAŞOVA