Bu gün 27.09.2020-ci ildə başlayan Vətən müharibəsi zamanı şəhid olan Azərbaycan Silahlı Qüvvələrinin əsgəri Abbaslı Elgin Ağayar oğlunun şəhadətə ucaldığı gündür. Sumqayit.tv xəbər verir ki, şəhidimizin anım mərasimi Şəhidlər Xiyabanında məzarını ziyarət edilərək başlayıb, sonra isə mərasim evlərinin birində ehsan süfrəsi verilərək davam edib. Tədbir şəhidlərimizin ruhlarına 1 dəqiqəlik sükutla və Azərbaycan Respublikasının Himni ilə başlayıb.  Mərasimdə İcra Hakimiyyətinin nümayəndələri, şəhidimizin təhsil aldığı 21 nömrəli məktəbin müəllim kollektivi və şagirdləri, Corat məscidinin axundu Hacı Rauf Sərdarov, qazilər, qohumlar və şəhid ailələri iştirak ediblər.
Qeyd edək ki, Elgin Abbaslı 16.05.1991-ci ildə Laçın rayonunun Dəyhan kəndində dünyaya göz açmışdır. 1992-ci ildə Laçın işğal olunduğu üçün ailəsi ilə birgə Sumqayıta köçüb. Orta təhsilini aldıqdan sonra Elgin hərbi xidmətə yollanmışdır. Uşaq yaşlarından hərbçiliyə marağı olduğundan hərbi xidmət müddəti bitdikdən sonra, 2014-cü ildə müddətdən artıq həqiqi hərbi xidmət qulluqçusu olmuş, hərbi xidmətini davam edib. Pirəkəşküldə yerləşən hərbi hissədə tibb bölüyündə xidmət edib.
Azərbaycan Silahlı Qüvvələrinin əsgəri olan Elgin Abbaslı 27.09.2020-ci il tarixindən Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsində iştirak edib. Füzulinin, Cəbrayılın, Füzulinin, Zəngilanın, Qubadlının, Laçının və Şuşanın azadlığı uğrunda gedən döyüşlərdə vuruşub. Elgin Abbaslı 10.11.2020-ci ildə Şuşa istiqamətində döyüş tapşırığını yerinə yetirərkən qəhrəmancasına şəhidlik məqamına ucalmışdır. Azərbaycan Prezidenti İlham Əliyevin Sərəncamına əsasən Elgin Abbaslı ölümündən sonra "Füzulinin azad olunmasına görə", "Şuşanın azad olunmasına görə", "Vətən uğrunda", "Cəbrayılın azad olunmasına görə" və "Şücaətə görə" medalları ilə təltif edilib. 

Allah ruhunu şad etsin, Qəhrəman! 

Müxbir:Vəsiqə DADAŞOVA