Daxili İşlər Nazirliyinin (DİN) Baş İctimai Təhlükəsizlik İdarəsinin rəisi vəzifəsinə təyinat olub.
Sumqayıt.tv report- a istinadən xəbər verir ki, daxili işlər naziri Vilayət Eyvazovun imzaladığı əmrlə polis general-mayoru Sərdar Səfərov həmin idarənin rəisi təyin edilib.
Səfərov Sərdar Süleyman oğlu bu təyinata qədər Bakı Şəhər Baş Polis İdarəsi rəisinin xidmət üzrə müavini vəzifəsində çalışırdı.
Qeyd edək ki, 1973-cü ildə Sumqayıt şəhərində anadan olub.
1994-cü ildə Azərbaycan Dövlət Bədən Tərbiyəsi İnstitutunu, 1999-cu ildə Türkiyə Respublikasının Jandarma Zabitlər Məktəbini, 2020-ci ildə isə DİN-in Polis Akademiyasını bitirib.
1996-cı ildən 2005-ci ilin avqust ayınadək Daxili Qoşunlarda xidmət etmiş və bu müddət ərzində müxtəlif məsul vəzifələrdə işləyib. O cümlədən, DİN-in Daxili Qoşunların hərbi hissələrində Motorlaşdırılmış Alayının Xüsusi təyinatlı bölüyünün komandiri, Xüsusi Motorlasdırılmış Alayının Xüsusi təyinatlı taborunun komandirinin müavini-qərargah rəisi vəzifələrində xıdmət edib.
2005-ci ildən daxili işlər orqanlarında xidmətə başlamış o cümlədən, bölük komandirinin müavini, bölük komandiri vəzifələrində, 2019-2022-ci illərdə Bakı Şəhər Baş Polis İdarəsinin İctimai Təhlükəsizlik İdarəsinin rəis müavini və həmin İdarənin rəisi vəzifələrində xidmət edib.
Azərbaycan Respublikası Prezidentinin 01 iyul 2022-ci ildəki sərəncamı ilə polis general-mayoru xüsusi rütbəsi verilib.
Azərbaycan Respublikası Prezidentinin 06 may 2005-ci il tarixli sərəncamı ilə "Hərbi xidmətlərə görə”, Prezidentin 01 iyul 2013-cü il tarixli sərəncamı ilə "İgidliyə görə", Prezidentin 29 iyun 2018-ci il tarixli sərəncamı ilə "Vətən uğrunda” medalları ilə təltif edilib.
Ailəlidir, 3 övladı var.