Sumqayıt Regional Mədəniyyət İdarəsinə tabeli S.Vurğun adına Mərkəzi Kitabxanada yazıçı-tərcüməçi Arif Ərşadın yazıçı-publisist, kinossenarist, Azərbaycan Yazıçılar Birliyinin üzvü, Respublikanın Əməkdar jurnalisti Eyruz Məmmədova həsr edilən "Eyruzun ömür kitabı” adlı kitabının təqdimatı keçirilib. Şəhərimizin ziyalılarının, kitabxananın əməkdaşlarının və oxucularının iştirakı ilə baş tutan təqdimatı giriş sözü ilə Sumqayıt şəhər MKS-nin direktor vəzifəsinin müvəqqəti icra edən  Natəvan Axundzadə açaraq tədbir haqqında iştirakçıları məlumatlandırıb. Torpaqlarımızın azadlığı və suverenliyi uğrunda canlarını qurban verən vətən övladlarının xatirəsi bir dəqiqəlik sükutla yad edilib. 
Tədbirin aparıcısı Sumqayıt "Dostlar Klubu"nun sədri, həkim-filosof, yazıçı-publisist Hümbət Həsənoğlu kitab haqqında öz təəssüratlarını bölüşdükdən sonra qonaqları iştirakçılara təqdim edib. Şəhərimizin ziyalılarından yazıçı-dramaturq, Əməkdar İncəsənət xadimi Ağalar İdrisoğlu, AYB-nin Sumqayıt bölməsinin sədri Gülnarə Cəmaləddin, şair Asif Asiman, MKS-nin baş biblioqrafı Yeganə Əhmədova, şair Lilpar Cəmşidqızı, sahibkar Akif Şahbazov, "Sumqayıt” qəzetinin əməkdaşı İlhamə Məhəmmədqızı  kitab haqqında öz fikirlərini bildirməklə yanaşı, Eyruz müəllimin mərdlik, cəsarət, vəzifəsindən, rütbəsindən asılı olmayaraq heç kimin qarşısında əyilməmək, qələmi ilə haqqı, ədaləti həmişə müdafiə etmək kimi xüsusiyyətlərindən də bəhs ediblər. 
Tədbirdə yazıçı-dramaturq Arif Ərşad çıxış edərək kitabın yaranması haqqında öz maraqlı xatirələrini iştirakçılarla bölüşüb. Eyruz müəllim öz çıxışında müəllifə, qələm dostlarına, ümumiyyətlə, bütün iştirakçılara təşəkkürünü bildirərək, kitabxanaçılara olan hörmətini ifadə etməklə kitabxanaları məbədgah adlandırıb. 
Sonda Natəvan Axundzadə çıxış edərək bütün iştirakçılara öz təşəkkürünü bildirməklə belə təqdimatların daha da çox olmasını vurğulayıb.