“Ukraynadakı müharibənin nəticələri həyəcanlandırıcıdır. Rusiya qalib gəlsə, NATO sistemi, Avropa İttifaqı modeli təhdid altında düşəcək. Ukrayna qələbə qazansa, bu zaman Rusiya doktrinasına dəyişiklik etmək məcburiyyətində qalacaq”.
Bu sözləri Globalinfo.az-a siyasi şərhçi Aqşin Kərimov NATO Baş katibi Yens Stoltenberqin “Rusiya yeni hərbi hücuma hazırlaşır” sözlərini şərh edərkən deyib.
Onun sözlərinə görə, böyük güclərin kiçik dövlətlərə qarşı müharibələr təcrübəsindən sonra onların doktrinasına həlledici dəyişikliklər etmədiyini göstərir:
“ABŞ Vyetnamda, SSRİ Əfqanıstanda məğlub olmuşdu, amma nə Vaşinqton, nə də SSRİ-nin mirasçısı olan Rusiya öz ambisiyalarının miqyasını kiçildib.
Ukrayna isə ambisiyaların format olunması üçün son hədd formasında qırmızı xətt kimi görünür. Bunu göstərən nişanə NATO-nun Ukraynaya hərbi yardımlar paketini genişlətməsidir. Hərçənd ki, Rusiyanın da alternativləri var və cənab Stoltenberqin dedikləri didişən iri başların hələ uzun müddət bir-birini strateji sınağa çəkəcəyinin göstəricisidir.

Proseslərdən Çinin hansı nöqtəyə gələcəyi maraq doğurur, böyük ehtimalla Pekin Ukraynadakı müharibənin Rusiyanın xeyrinə dəyişəcəyi təqdirdə Tayvana müdaxilə imkanlarına baş vuracaq. Ukrayna müharibəsi beynəlxalq nizamın sınağa çəkilməsidir, güc balansının yerbəyer edilməsi üçün nəhəng oyunçuların əlində fürsətdir.
Ukraynadakı müharibədə tərəflərdən hansının qalib gələcəyini söyləmək də çətindir. Çünki döyüş meydanında taktiki dəyişikliklər baş verir və bu strateji maraqlara da cüzi təsir göstərir. Bu cüzi təsirlər böyüyüb şişəndə müharibənin yekununa hazırlıq başlanacaq”.