2022-ci ildə Avropa İttifaqı Ukraynanı işğal etdiyinə görə Rusiyaya əmtəə ixracını 30%-dən çox azaldıb. Bu, 2012-ci ildən bəri ən aşağı səviyyə sayılır.
Musavat.com xəbər verir ki, bununla bağlı “Eurostat” məlumat yayıb.
Məlumata əsasən, Aİ-dən Rusiyaya mal ixracı il ərzində 38% azalaraq 55,2 milyard avro təşkil edib (2012-ci ildə bu rəqəm iki dəfə yüksək olub). Xüsusilə avadanlıq və nəqliyyat vasitələrinin ixracı 59%, digər sənaye mallarının ixracı 39% azalıb. Qida və içkilərin ixracı dəyişməz qalıb.
Maraqlıdır ki, eyni zamanda, Avropa İttifaqının Rusiyadan idxalı il ərzində 24% artaraq 203,4 milyard avro təşkil edib. Bu isə son 10 il ərzində ən yüksək rəqəm deməkdir (2012-ci ildə 203,6 milyard avro). Burada enerji idxalının rekord – 42% artması diqqəti cəlb edir. Məlum olub ki, enerji sanksiyaları ərəfəsində Aİ ölkələri neft tədarükünü və maye qazın idxalını kəskin şəkildə artırıb.
Rusiya 2022-ci il fevralın 24-dən Ukraynada işğal savaşı aparır. Buna cavab olaraq, ABŞ və Avropa müntəzəm şəkildə Rusiya təşkilatları ilə əməkdaşlığı qadağan edən və ya məhdudlaşdıran sanksiyalar tətbiq edir. “Kommersant” qəzetinin yazdığına görə, il ərzində 2,9 min Rusiya mənşəli hüquqi şəxs və təşkilat sanksiyalara məruz qalıb. İdxal məhdudiyyətləri Rusiya biznesi üçün əsas problemə çevrilib: xarici şirkətlər xammal, komponentlər, ehtiyat hissələri və avadanlıq tədarük etməkdən imtina edirlər.
Rusiyanın Ukraynaya təcavüzündən sonra Qərbin 1200-dən çox şirkəti Rusiyada fəaliyyətini məhdudlaşdırıb, onlardan 519-u ölkəni tamamilə tərk edib.
2022-ci ildə Rusiya ilə onun əsas ticarət tərəfdaşı olan Çin arasında ticarət dövriyyəsi rekord həddə çatıb. Çindən Rusiyaya ixrac 12,8% artaraq 76,1 milyard dollara çatıb. Rusiyadan Çinə ixrac 43,4% artaraq 114,2 milyard dollar təşkil edib. Bunun əhəmiyyətli bir hissəsi, treyderlərin bildirdiyinə görə, Rusiya tərəfindən 30%-ə qədər endirimlə satılan enerji məhsullarıdır.