"Twitter" Amerikanın maraqlarından çıxış edən sosial şəbəkədir və biz öz təbliğatımızı irəliyə aparmaq üçün ondan riyakarcasına istifadə etmişik..."
 
Rusiya Təhlükəsizlik Şurası katibinin müavini Dmitri Medvedev etiraf edib ki, Rusiya hakimiyyəti "Twitter" sosial şəbəkəsindən "tamamilə riyakarcasına" öz "təbliğat məqsədlərini" irəliyə aparmaq üçün istifadə edib.
 
Sumqayit.tv Moderator.az-a istinadən xəbər verir ki, bu barədə Medvedev "RİA Novosti" informasiya agentliyinin sualına cavabında deyib.
Jurnalistlər məmurdan Polşanın hakimiyyətdə rusofobların olduğu dönəmındə Rusiya üçün mövcud olmaması, Ukraynada isə çoxsaylı Polşa muzdlularının olması barədə postunun nədən "Twitter" tərəfindən  ləğv edildiyini soruşub.
Bu suala cavabında Medvedev deyib ki, bu sosial şəbəkə "Dövlət Departamenti və ukraynalılar qarşısında əyilməli olub".
"Heyhat, İlon bu tapşırığın öhdəsindən gələ bilməyib..." - Medvedev yazıb və əlavə edib ki, öz məqsədlərini irəliyə aparmaq üçün rusiyalı təbliğatçılar "Twitter"siz də ötüşə bilər.
"Nəticə etibarilə bu, sadəcə, Amerika hökumətinin maraqlarından çıxış edən xarici sosial şəbəkədir. Biz riyakarcasına ondan öz təbliğat məqsədlərimizi irəliyə aparmaq üçün istifadə etmişik", - Medvedev bəyan edib.
O, qeyd edib ki, Rusiyanın məqsədi "bütün düşmənləri" məğlubiyyətə uğratmaqdır, bu sırada o, ABŞ, NATO, "Ukrayna nasistləri", "iyrənc Polşa" və "Qərb yaramazları"nı qeyd edib.
Rusiyalı məmurun sözlərinə görə, Rusiyanın məqsədi həmçinin "bizə məxsus olan bütün torpaqların" qaytarılmasıdır.
Medvedev Rusiyanın yüksək vəzifəli məmurlarından ilk olaraq 2010-cu ildə özünə "Twitter" səhifəsi açıb. O zaman o, Rusiyanın prezidenti olub. 
Ukraynada müharibə başlanandan Medvedev qatı militarist kimi daima Qərb ölkələrinin ünvanına hədə-qorxu gəlib, bu zaman nüvə müharibəsi barədə mülahizələr yürüdərək sərt ritorika və az qala küçə söyüşlərindən yararlanıb.