Sumqayıt Apellyasiya Məhkəməsində hakimiyyət nümayəndəsinə qarşı müqavimət göstərmə və zor tətbiq etmədə təqsirləndirilən Yunis Əsgərovun (adı, soyadı şərtidir) barəsindəki hökmdən verilən apellyasiya protesti və şikayət üzrə məhkəmə iclası yekunlaşıb.

Sumqayit.tv xəbər verir ki, hakim Ruhiyyə Əsgərovanın sədrliyi ilə keçirilən prosesdə qərar elan olunub.
Qərara əsasən, apellyasiya protesti və şikayət təmin edilməyib, birinci instansiya məhkəməsinin hökmü qüvvədə saxlanılıb.

İttiham aktına əsasən, Yunis Əsgərov bu ilin əvvəlində Siyəzən şəhərində sərxoş vəziyyətdə olarkən şəxsi münasibətlər zəminində Zaman Budaqov adlı şəxsə bıçaqla xəsarət yetirib. Yaralı Siyəzən Rayon Mərkəzi Xəstəxanasına yerləşdirildikdən sonra, təqsirləndirilən şəxs də xəstəxanaya gələrək səs-küy salıb.

Hadisə barədə Siyəzən Rayon Polis Şöbəsinə məlumat verilib və Yunis Əsgərov polis əməkdaşları tərəfindən şöbəyə gətirilib.
Lakin o, şöbədə qanuni tələblərə tabe olmayıb, nalayiq ifadələr işlədib və polis əməkdaşına zərbə vurub.

Nəticədə, hadisə zamanı zərərçəkmiş polis əməkdaşı S.M. sağlamlığa yüngül zərər vuran xəsarət alıb.

Siyəzən Rayon Məhkəməsinin hökmü ilə Yunis Əsgərov 11 ay 28 gün müddətinə azadlıqdan məhrum edilib və məhkəmə zalında həbs olunub.
Bu qərardan verilən apellyasiya şikayəti və protest isə Sumqayıt Apellyasiya Məhkəməsi tərəfindən təmin edilməyib.

7-11-2025, 10:25 71