Sumqayıt və Saray istiqamətində hərəkət edən 500, 503 və 508 nömrəli marşrut avtobuslarında kondisionerlərin işləmədiyinə dair yayılan şikayətlərə “BakuBus” MMC münasibət bildirib.

Sumqayit.tv Oxu.az-a istinadən xəbər verir ki, qurumun mətbuat katibi Əsmər Əliyevanın sözlərinə görə, qeyd olunan marşrutlarda kondisioner sistemləri hazırda işlək vəziyyətdədir.

Bildirilib ki, 500 nömrəli xətt üzrə bir avtobusda kondisionerlə bağlı texniki nasazlıq qeydə alınsa da, problem qısa müddətdə aradan qaldırılıb. Həmçinin sürücü ilə sərnişin arasında mübahisə baş verməsi ilə bağlı şirkətə hər hansı rəsmi məlumat daxil olmayıb.

Qurum qeyd edib ki, iyunun 2-dən etibarən istismarda olan bütün avtobuslarda kondisionerlər yay rejiminə uyğun aktivləşdirilib. Hazırda xəttə çıxan avtobusların təxminən 90 faizində soyutma sistemi tam işlək vəziyyətdədir.

“BakuBus” sərnişinlərə kondisionerlə bağlı hər hansı nasazlıqla qarşılaşdıqları halda marşrut nömrəsini, avtobusun dövlət qeydiyyat nişanını, hərəkət istiqamətini və vaxtı qeyd edərək şirkətə müraciət etmələrini tövsiyə edib. Bildirilib ki, daxil olan müraciətlər operativ şəkildə araşdırılır və zəruri tədbirlər görülür.

2-07-2026, 15:05 47