Azərbaycanda kraudfandinq platformalarının fəaliyyətinin tənzimlənməsi ilə bağlı yeni qanun layihəsi Milli Məclisin iclasında birinci oxunuşda qəbul edilib.

Sumqayit.tv xəbər verir ki, "Kraudfandinq haqqında" yeni qanun layihəsinə əsasən, kraudfandinq platformalarını yalnız Azərbaycan Mərkəzi Bankının reyestrinə daxil edilmiş operatorlar idarə edə biləcəklər.

Layihəyə görə, operatorlar məhdud məsuliyyətli cəmiyyət və ya səhmdar cəmiyyəti formasında yaradılacaq. Onların minimum nizamnamə kapitalı, məcmu kapitalı, daxili idarəetmə sistemi, texniki təhlükəsizlik standartları və fəaliyyət qaydaları Mərkəzi Bank tərəfindən müəyyən ediləcək.

Sənəddə maraqlar münaqişəsinin qarşısının alınması, platformalarda yerləşdirilən layihələrin şəffaflığının təmin olunması, investorların məlumatlandırılması və maliyyə hesabatlarının açıqlanması ilə bağlı yeni tələblər də öz əksini tapıb.

Bundan başqa, operatorların öz platformalarında yerləşdirilən layihələrin sahibi olmaları qadağan edilir. Onlara yalnız qanunla müəyyən edilən məhdud həcmdə investisiya yatırmağa icazə veriləcək.

Qanun layihəsinə əsasən, kraudfandinq sahəsində dövlət tənzimlənməsi və nəzarəti tam şəkildə Azərbaycan Mərkəzi Bankı tərəfindən həyata keçiriləcək.

Layihə Milli Məclisdə səsə qoyularaq birinci oxunuşda qəbul edilib.

7-07-2026, 12:54 35