“Türkiyə tərəfindən Krım tatarlarına ən böyük dəstək Rəcəb Tayyib Ərdoğan tərəfindən olunub”.
Bunu “Report”un Şərqi Avropa bürosuna Ukraynanın xalq deputatı, Krım Tatar Milli Hərəkatının lideri Mustafa Cəmilev (Krımoğlu) bildirib.
Onun sözlərinə görə, Krım tatarları Türkiyədə mayın 14-də keçiriləcək prezident seçkilərində Rəcəb Tayyib Ərdoğana uğurlar arzu edirlər:
“Bizim Türkiyəyə ilk ziyarətimiz zamanı ölkə lideri Turqut Özal idi. Həmin tarixdən sonra Türkiyənin bütün ölkə başçıları ilə görüşlərim olub. Onlar Krım tatarlarına əllərindən gələn dəstəyi göstəriblər. Ən böyük dəstəyi isə Rəcəb Tayyib Ərdoğanın lider olduğu dövrlərdə hiss etmişik. Onun Türkiyənin Baş naziri olduğu zaman verdiyi dəstəyin Krım tatar xalqına çox köməyi oldu. Prezident olandan sonra da bizim Ərdoğanla görüşlərimiz sıx xarakter alıb və indi də davam edir”.

Türkiyədə müxalifətdə olan siyasətçilərlə də münasibətlərinin pis olmadığını deyən Mustafa Cəmilev eyni zamanda onların parlament cümhuriyyəti ideyası ilə bağlı fikirlərini də dilə gətirib:
“Onlar seçkilərdən sonra parlamentli cümhuriyyət qurmaq istəyirlər. Bunun Türkiyə üçün yaxşı, ya pis olacağını deyə bilmirəm. Amma əminəm ki, o zaman vacib qərarın operativ, dinamik şəkildə verilməsi çətin olacaq. Amma yenə də qərarı Türkiyə xalqı verəcək”.