Rusiya cəmiyyətini xaricdən, o cümlədən mürəkkəb texnologiyaların köməyi ilə sabitliyi pozmağa və parçalamağa cəhd edirlər.
APA-nın Moskva müxbiri xəbər verir ki, bunu Rusiya Prezidenti Vladimir Putin Dağıstanda oktyabrın 29-da baş verən iğtişaşlarla bağlı keçirdiyi müşavirədə bildirib. Onun sözlərinə görə, Yaxın Şərqdəki vəziyyətdən “geosiyasi kukla oynadanlar” eqoist məqsədləri üçün istifadə edirlər. Rusiya lideri qeyd edib ki, Qəzzada yüz minlərlə günahsız vətəndaşın bombalanmasına heç nə haqq qazandıra bilməz.
"Yaxın Şərqdəki faciənin arxasında kimin dayandığını real qiymətləndirmək lazımdır. Bunlar ABŞ və onun sattelitləridir. ABŞ zəifləyir və mövqeyini itirir, amerikansayağı dünya keçmişdə qalır. Birləşmiş Ştatlar qlobal diktaturasını genişləndirmək istəyir və Rusiya Federasiyasında və digər rəqiblərində xaos vasitəsilə sabitliyi pozmağı gözləyir. Ukrayna, Yaxın Şərq və dünyanın digər regionlarında baş verən münaqişələrin arxasında ABŞ-ın hakim elitaları və onların sattelitləri dayanır.
ABŞ-yə Müqəddəs Torpaqda davamlı sülh lazım deyil. Qərb Qəzza zolağında atəşi dərhal dayandırmaq cəhdlərini rədd edir, hətta BMT-nin mövqeyinə belə qarşı çıxır.
Rusiya çoxqütblü dünyanın qurulmasının ədalətli prosesində liderlərdən biridir və onun uğrunda döyüş meydanında mübarizə aparır. ABŞ isə Rusiyanı daxildən parçalamaq, zəiflətmək və çaşqınlıq yaratmaq istəyir", deyə Putin qeyd edib.