Xəbər verildiyi kimi, Fransa prezidenti Emmanuel Makron sabah Orta Asiya ölkələrinə rəsmi ziyarət gerçəkləşdirəcək.
Sumqayit.tv xarici agentliklərə istinadən xəbər verir ki, həmin səfər zamanı Makron Qazaxıstan və Özbəkistandan uran tədarükünün artırılması barədə razılığa gəlmək niyyətindədir.
Məlumata görə, səfərin əsas məqsədi Rusiyadan yanacaq təchizatından asılılığını azaltmaq baxımından Fransanın enerji təhlükəsizliyini gücləndirmək olacaq. Danışıqların gündəliyinin əsas bəndlərindən biri Fransanın “Orano” (keçmiş “Areva”) nüvə şirkətinin Qazaxıstandakı mövcudluğunun genişləndirilməsidir. Fransa nüvə elektrik stansiyalarına əsas uran tədarükçüsü sayılan Nigerdə hərbi çevrilişdən sonra oradakı yataqlarından birinin işlədilməsini dayandırmalı olub. “Bloomberg” agentliyi Fransa Beynəlxalq Münasibətlər İnstitutunun eksperti Maykl Levistondan sitat gətirib: “İndi Qazaxıstan Fransanın enerji təhlükəsizliyinin açarıdır”.
Fransa lideri səfər zamanı keçmiş sovet respublikalarından Rusiyadan asılılıq səviyyəsini azaltmaq üçün addımlar atmalarını da istəyəcək. Fransız analitiklərin gəldiyi qənaətə görə, Ukraynadakı münaqişə regionda çoxdan formalaşmış münasibətlər sistemini pozub və Mərkəzi Asiya ölkələrinin Moskvanın təsirindən çıxması üçün uyğun imkanlar yaranıb.
Qeyd edək ki, 2022-ci ildən Qazaxıstan Fransa üçün nəinki ən böyük uran tədarükçüsünə, həm də ikinci ən böyük neft ixracatçısına çevrilib.//Musavat.com