Bu gecə Rusiyanın ən böyük maye qaz istehsalçısı olan NOVATEK şirkətinin Ust-Luqa istehsalat kompleksində istehsalat obyektlərində yanğın baş verib, texnoloji proses dayandırılıb.
Rusiya tərəfinin yaydığı məlumata görə, yanğın xarici təsirlər nəticəsində baş verib. Xəsarət alan, insan həyatı və sağlamlığı üçün təhlükə olmayıb: "Hazırda yanğın lokallaşdırılıb, müəssisənin, qəza-xilasetmə xidmətlərinin və Fövqəladə Hallar Nazirliyinin mütəxəssisləri karbohidrogenlərin qalıq yanmasına nəzarət edirlər”.
Hadisənin nəticələrinin aradan qaldırılması üçün operativ qərargah yaradılıb. Zərər daha sonra qiymətləndiriləcək.
NOVATEK-in istehsal prosesləri (digər müəssisələr - red. ) normal rejimdə işləməkdə davam edir.
Qeyd edək ki, Ust-Luqa limanında dayanıqlı qaz kondensatının fraksiyalaşdırılması və daşınması kompleksində dayanıqlı qaz kondensatı yüngül və ağır nafta, kerosin, dizel fraksiyasına və dəniz yanacağının komponentinə (mazut) çevrilir, hazır məhsul dəniz yolu ilə ixrac edilir.
Kompleks həmçinin stabil qaz kondensatının ixrac üçün daşınmasına imkan verir.
2022-ci ildə kompleksdə 6,9 milyon ton dayanıqlı qaz kondensatı emal edilib və 6,8 milyon ton əmtəəlik məhsul, o cümlədən 4,2 milyon ton yüngül və ağır nafta, 1,05 milyon ton ağ neft, 1,5 milyon ton dizel fraksiyası və dəniz yanacağının komponenti, 78 min ton LPG istehsal edilib.
Onu da bildirək ki, terminaldakı yanğına səbəb olan xarici təsir Ukrayna kamikadze dronudur. //Musavat.com