Abşeron rayonunda 1987-ci il təvəllüdlü Loğman şəxsi münasibətlər zəminində yaranan mübahisə zamanı həyat yoldaşı Günaya (adlar şərti göstərilib – red.) xəsarət yetirib. 

Demokrat.az-ın əldə etdiyi məlumata görə, hadisə ötən ilin mayın 1-də Abşeron rayonu, Xırdalan şəhərində baş verib. 

Loğman həmin gün saat 22.00-da arvadı Günayla kirayədə yaşadığı evdə ailə məişət zəminində aralarında baş vermiş mübahisə zamanı stolun üzərində olan bıçağı götürərək, ona xəsarətlər yetirib. 

Hadisəni törədən Loğmanın barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Loğman ona elan olunmuş ittiham üzrə özünü təqsirli bilib. O bildirib ki, Günayla 14 ildir ailə həyatı qurublar: “Günay həm də mənim xalam qızıdır, 6 övladımız var. Münasibətlərimiz həmişə yaxşı olub. Hadisə baş verən günü, saat 22 radələrində Günay ilə ailə məişət zəminində mübahisələrimiz düşdü. Günay mənim rəhmətə getmiş anamı söydüyünə görə əsəbləşdim, onu mətbəx bıçağı ilə vurdum. Həmin vaxt Günaya neçə bıçaq vurduğumu bilməmişəm. Günayın qarın hissəsindən qan gəldiyini gördükdə, bir anlıq özümü itirdim. Nə edəcəyimi bilməmişəm. Evdə bint axtarmağa başladım. Lakin bint tapa bilmədiyimdən evdəki çexoldan cıraraq onun yaralarını bağladım. Günaydan özünü necə hiss etdiyini soruşdu. O, “yaxşıyam, amma mənə su ver” dediyindən ona su verdim. Həkimə zəng etmək istədim. Günay “lazım deyil, həkimə zəng etsən, biləcəklər, səni tutacaqlar, uşaqlar qalacaq başsız” dediyindən həkimə zəng etmədim. Günayın paltarları qana bulaşdığından həmin paltarları və  vurduğum mətbəx bıçağını götürərək həmin evdən aralıda olan zibil yeşiyinə tulladım. Hava işıqlanana qədər yanında gözlədim. Saat təxminən 13 radələrində qaynanam Səmayəyə zəng edərək hadisə barədə məlumat verdim. Sonra polis əməkdaşları yaşadığı mənzilə gələrək məni Abşeron Rayon Polis İdarəsinin İstintaq Şöbəsinə apardılar. İstintaq vaxtı da həyat yoldaşım məndən şikayətçi olmayıb. İndi də şikayətçi deyil. Mən fəhləlik edib uşaqlarıma baxıram. Törətdiyim əmələ görə peşmanam”.

Bu cinayət işinə Sumqayıt Ağır Cinayətlər Məhkəməsində baxılıb. Məhkəmənin hökmü ilə Loğmanın barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Ona 1 il 6 ay sınaq müddəti olmaqla 3 il şərti cəza təyin edilib.

Təqsirləndirilən şəxsin üzərinə davranışına nəzarəti həyata keçirən orqana məlumat vermədən daimi yaşayış yerini dəyişməmək, habelə həmin orqanı iş yerinin dəyişdirilməsi barədə əvvəlcədən məlumatlandırmaq vəzifəsi qoyulub.