Ailə-məişət münaqişəsi zəminində həyat yoldaşına yüngül bədən xəsarətləri yetirməkdə təqsirləndirilən şəxs barəsində məhkəmə hökm çıxarıb.

Sumqayit.tv xəbər verir ki, hadisə 2026-cı ilin iyun ayında, Qurban bayramı ərəfəsində ailənin yaşadığı evdə baş verib.

Məhkəmə materiallarına əsasən, mübahisəyə qadının bayram münasibətilə Sumqayıt şəhərində yaşayan bacısının evinə qonaq getmək istəməsi səbəb olub. Tərəflər arasında yaranan mübahisə zamanı kişi həyat yoldaşının hər iki qoluna, döş qəfəsinə və sol ayaq nahiyəsinə zərbələr endirib.

Məhkəmə-tibbi ekspertizasının rəyinə görə, zərərçəkmiş qadının sol baldırının aşağı hissəsində dərialtı hematoma, döş qəfəsi, hər iki bazu və sol dirsək nahiyəsində qançırlar aşkarlanıb. Müəyyən edilib ki, bu xəsarətlər sağlamlığın qısa müddətə pozulmasına səbəb olan yüngül bədən xəsarətləri hesab olunur.

Təqsirləndirilən şəxs məhkəmədə özünü təqsirli bildiyini, hadisədən peşman olduğunu və həyat yoldaşı ilə barışdıqlarını deyib. Onun sözlərinə görə, mübahisədən sonra zərərçəkmiş qadın Azərbaycan Respublikasının Daxili İşlər Nazirliyinin "102" Xidmətinə müraciət edib.

Zərərçəkmiş qadın da ifadəsində həyat yoldaşı ilə barışdığını, ona qarşı heç bir şikayət və tələbinin olmadığını bildirib.

Məhkəmə təqdim olunan sübutları araşdırdıqdan sonra təqsirləndirilən şəxsi Cinayət Məcəlləsinin 128-ci maddəsi (qəsdən sağlamlığa yüngül zərər vurma) ilə təqsirli bilərək 1200 manat məbləğində cərimə cəzasına məhkum edib.

Bu gün, 16:25 8