Sumqayıt Şəhər Məhkəməsində dələduzluqda təqsirləndirilən Rüfət Əkbərovun (şərti) cinayət işi üzrə məhkəmə istintaqı yekunlaşıb.
Sumqayit.tv xəbər verir ki, Pravda.az-ın əldə etdiyi məlumata görə, hakim Rövşən Xəlilovun sədrliyi ilə keçirilən prosesdə hökm oxunub. Məhkəmənin hökmü o, 4 il müddətinə azadlıqdan məhrum edilib. Təqsirləndirilən şəxs cəzasını ümumi rejimli cəzaçəkmə müəssisəsində çəkəcək.
İttihama görə, Rüfət Əkbərov etibardan sui-istifadə və ya aldatma yolu ilə özgənin xeyli miqdarda əmlakını qanunsuz və əvəzsiz olaraq öz mülkiyyətinə keçirmək məqsədilə Sumqayıt şəhəri, Sülh küçəsində yerləşən “Cavid” ticarət mərkəzində qızıl satışı ilə məşğul olan zərərçəkmiş Nailə Əliyevadan (şərti) əvvəllər bir neçə dəfə nisyə qızıl-zinət əşyaları götürməklə satıb pulunu qaytararaq etibarını qazanıb. O, 2022-ci ilin yanvar ayının əvvəllərində yenidən ondan xeyli miqdarda qızıl-zinət əşyaları götürməklə satıb pulunu qaytaracağına dair yalan vəd verib aldadıb. Rüfət həmin qadından ümumilikdə 45 539 manat dəyərində qızıl-zinət əşyaları alaraq dələduzluq edib. Bundan başqa, təqsirləndirilən şəxs “Cavid” ticarət mərkəzində qızıl satışı ilə məşğul olan zərərçəkmiş Lalə Həsənovanı (şərti) da eyni üsulla aldadaraq, onun ümumilikdə 34 960 manat dəyərində qızıl-zinət əşyalarını dələduzluq yolu ilə ələ keçirib. Daha sonra Rüfət Əkbərov verdiyi vədə əməl etmədiyi üçün zərərçəkmişlər hüquq-mühafizə orqanlarına müraciət edib və o, saxlanılıb, barəsində həbs qətimkan tədbiri seçilib.
Qeyd: Məhkəmədə Rüfət Əkbərov ona elan edilmiş ittihamda özünü təqsirli bilməyərək və iddia ərizələrini qəbul etməyərək ifadəsində göstərib ki, qızıl-zinət əşyalarının alqı-satqısı ilə məşğul olub.