Sumqayıtda 13 yaşlı uşağı elektrik cərəyanı vurub.
Sumqayit.tv qafqazinfo-ya istinadən xəbər verir ki, 2010-cu il təvəllüdlü Əliyev Aslan Zaur oğlunu yaşadığı evin yaxınlığında cərəyan vurub. Ağır xəsarət alan məktəbli əvvəlcə Sumqayıtdakı xəstəxanaya, daha sonra Respublika Yanıq Mərkəzinə yerləşdirilib.
Başın, qulaq seyvanının, sağ yuxarı ətrafın, gövdənin arxa səthinin, sol dabanın 3-cü və 4-cü dərəcəli elektrotexniki yanığı, yanıq şoku diaqnozu qoyulan Aslan Əliyev sonra özəl xəstəxanaya köçürülüb. Yaxınlarının bildirdiyinə görə, onun cərəyan vuran əli çiyindən amputasiya edilib. Yeniyetmənin vəziyyəti ağır olaraq qalır.
Qeyd edək ki, A.Əliyevin yaxınları açıq sahədə elektrik naqilinin aşağı hündürlükdən keçməsi səbəbindən bədbəxt hadisənin baş verdiyini iddia ediblər.
***
İcbari Tibbi Sığorta üzrə Dövlət Agentliyi məsələ ilə bağlı açıqlama verib.
Bildirilib ki, Əliyev Aslan Zaur oğlunun bütün müalicə xərcləri özəl xəstəxanaların birində icbari tibbi sığorta hesabına aparılır.
"Uşağın sağ qolu amputasiya olunub. Vəziyyəti ağır stabil qiymətləndirilir. Valideynə və klinikaya məlumat verilib ki, xərcləri İcbari Tibbi Sığorta üzrə Dövlət Agentliyi qarşılayır", - deyə agentlikdən bildirilib.