YAP Sumqayıt şəhər təşkilatının əməkdaşları və Sumqayıt Dövlət Universitetinin tələbələri Aprel döyüşlərinin səkkizinci ildönümü ilə əlaqədar Sumqayıt şəhidlər xiyabanını ziyarət ediblər.
Sumqayit.tv xəbər verir ki, ziyarət zamanı əvvəlvə Azərbaycanın müstəqilliyi və ərazi bütövlüyü uğrunda canlarından keçmiş Vətən övladlarının xatirəsi bir dəqiqəlik sükutla yad edib, Şəhidlər xiyabanında ucalan Qalib Əsgər abidəsi ziyarət edilib, önünə gül dəstələri düzülüb, şəhidlərin əziz xatirəsi ehtiramla anılıb.
Ziyarət zamanı YAP İdarə Heyətinin üzvü, Sumqayıt şəhər təşkilatının sədri Ramiz Hüseynov bildirib ki, Azərbaycan ordusunun qələbəsi ilə bitən aprel döyüşlərindən səkkiz il ötür. 2016-cı ildə baş vermiş dördgünlük müharibədə qəhrəman əsgər, gizir və zabitlərimiz təcavüzkar Ermənistan ordusuna ağır zərbələr endirərək 2 min hektardan artıq ərazini işğaldan azad ediblər. Aprel döyüşləri Azərbaycan xalqının erməni işğalı altında olan torpaqların hərbi yolla azad edilməsinə daha çox inamını möhkəmləndirib. Xalqımız hər zaman qələbəmizin başlanğıcı olan Aprel döyüşlərini böyük ehtiram və hörmətlə yad edəcək, öz canı-qanı bahasına Zəfər tariximizin təməlini qoyan şəhidlərimizin əziz xatirəsini daim qəlbində yaşadacaqdır!