Sumqayıt Ağır Cinayətlər Məhkəməsində qətl törətməkdə təqsirləndirilən Səftər Bünyətovun cinayət işi üzrə məhkəmə iclası başa çatıb.
Sumqayit.tv-ın etdiyi məlumata görə, hakim Fəhmin Hümbətovun sədrliyi ilə keçirilən prosesdə hökm oxunub.
Məhkəmənin hökmü ilə o, 18 il müddətinə azadlıqdan məhrum edilib.
Qeyd: Hadisə 2022-ci ilin avqustunda Sumqayıt şəhərində baş verib. Belə ki, S.Bünyətov şəxsi münasibətlər zəminində aralarında yaranmış mübahisə zamanı 2000-ci il təvəllüdlü Pərvin Dadaşovu bıçaqla xəsarətlər yetirərək qətlə yetirib.
S.Bünyətova qarşı Cinayət Məcəlləsinin 120.2.5-ci (qəsdən adam öldürmə, tamah məqsədi ilə və ya sifarişlə, habelə zərərçəkmiş şəxsin orqanlarından və ya toxumalarından istifadə etmək məqsədi ilə adam öldürmə) maddəsi ilə ittiham olunub.
 
İttihama görə, S.Bünyətov narkotik vasitədən asılılığını təmin edib narkotik vasitə almaq üçün pul əldə etmək məqsədilə 27 avqust 2022-ci il tarixdə saat 10-11 radələrində tanışı ilə Sumqayıt şəhəri 1-ci mikrorayon ərazisində görüşüb. O, narkotik vasitə almaq üçün ondan 15-20 manat məbləğində pul istəyib. Həmin şəxs pulu verməkdən imtina etdikdə narkotik vasitəyə olan ehtiyacını ödəmək məqsədilə saat 12:04-də digər tanışı, zərərçəkmiş P.Dadaşovun mobil telefona SMS göndərərək ondan 10 manat pul tələb edib. Zərərçəkmiş də pulunun olmadığını söylədikdə onu görüşə təkid edib. Həmin şəxslər saat 11:30 radələrində Sumqayıt şəhəri, 12-ci mikrorayon ərazisində yerləşən 9 mərtəbəli yaşayış binasının yaxınlığında görüşüblər. Səftər Pərvindən yenidən pul istəyib. Sonra onların arasında mübahisə yaranıb. Nəticədə o, mətbəx bıçağı Pərvinə zərbə endirərək onu qətlə yetirib.