Sumqayıt Dövlət Universitetində yeni təyinatlar olub. 
Sumqayit.tv xəbər verir ki, Osman Hacıyev Tədris Metodiki Mərkəzin direktoru, Samir Orucov isə Magistratura, doktorantura və elm şöbəsinin müdiri təyin olunub. 
Qeyd edək ki, son təyinata qədər hər iki şəxs Sumqayıt Dövlət Universitetidə müxtəlif vəzifələrdə çalışıblar.

Hacıyev Osman Yusif oğlu 2004-cü ildə Bakı Dövlət Universitetinin “Fəlsəfə” ixtisasını bakalavriat səviyyəsi üzrə, 2006-cı ildə “Sosial fəlsəfə” ixtisaslaşmasını magistratura səviyyəsi üzrə fərqlənmə diplomu ilə bitirmişdir. 
2007-ci ildən Sumqayıt Dövlət Universitetində elmi-pedaqoji fəaliyyətlə məşğul olan Osman Hacıyev müəllim, baş müəllim, dosent vəzifələrində çalışmışdır. 
2016-cı ildə “Orta sinif problemi sosial fəlsəfənin obyekti kimi” mövzusunda dissertasiya işini müdafiə edərək, 2018-ci ildə fəlsəfə üzrə fəlsəfə doktoru elmi dərəcəsini almışdır. 
Ümumilikdə 57 elmi işin, o cümlədən 20 elmi məqalə, 30 konfrans materialı və tezis, 1 dərs vəsaiti, 1 metodik vəsait, 5 fənn proqramının müəllifidir.
Tədrisin təşkili və təlim texnologiyalarına dair bir çox təlimlərdə iştirak etmişdir. 2017 – ci ildə Təhsil Nazirliyinin Fəxri Fərmanı, 2022-ci ildə “Azərbaycan Respublikası qabaqcıl təhsil işçisi” döş nişanı ilə təltif edilmişdir.
 
Orucov Samir Kamal oğlu 1994-cü ildə Bakı Dövlət Universitetini “Fizik, fizika müəllimi” ixtisası üzrə, 1998-ci ildə isə Azərbaycan Sənaye İnstitutunu “İqtisadçı” ixtisası üzrə bitirmişdir.
1997-cı ildən Sumqayıt Dövlət Universitetinin Fizika kafedrasında müxtəlif dövrlərdə laborant, laboratoriya müdiri, assistent, baş müəllim, dosent vəzifələrində çalışmışdır. 
2017-2024-cü illərdə Elmi hissənin müdiri vəzifəsində çalışıb. 
2006-cı ildə “Yarımkeçiricilər və dielektriklər fizikası” ixtisası üzrə dissertasiya müdafiəsini etmişdir. Fizika-riyaziyyat elmləri namizədidir.
2017 – ci ildə Azərbaycan Respublikasında təhsilin inkişafındakı xidmətlərinə görə “Azərbaycan Respublikası qabaqcıl təhsil işçisi” döş nişanı ilə, uzunmüddətli elmi-pedaqoji fəaliyyətinə görə Sumqayıt Şəhər İcra Hakimiyyətinin Fəxri Fərman ilə təltif olunmuşdur. 
Müxtəlif dərslik və dərs vəsaitlərinin, çoxlu sayda yerli və xarici məqələlərin müəllifidir.