Ölkə ərazisində müşahidə edilən kəskin istilərlə bağlı elektrik enerjisinə tələbat artıb. Tələbat artdıqca, elektrikin gücündə problem yaranıb. Bir müddətdir ki, Sumqayıtın bəzi ərazilərində evlərə verilən elektrikin gücü qənaətbəxş deyil. Hətta yüklənmələrin çoxluğundan işığın verilişində fasilələr yaşanır. İstilərdən nəfəsi kəsilən sakinlərin tək çarəsi isə gözləmək olur.
Sumqayit.tv-yə məlumat verən  Corat sakinləri 5 ildir ki, işıqla bağlı çətinliklər yaşadığını bildiriblər: "Bizim işıq idarəsi novxanı ərazisində yerləşir. Hər il bir qrup corat sakini idarəyə gedib işıqların çox zəif olduğunu bildiririk. Elektrik xətlərində gərginliyin aşağı olması və işıqların azalıb çoxalması barədə məlumat verməyimizə baxmayaraq bizim məsələyə baxan yoxdur. Qonşuların elektrik avadanlıqları yanıb. 
Sakinlərin sözlərinə görə, çoxsaylı zərərçəkmə faktları ilə bağlı dəfələrlə işıq idarəsinə demələrinə baxmayaraq şikayətə baxan yoxdur: "Əhali artır və hamıya işıq xətti verilir. Amma, transformatr yenilənmir. Kiçik ölçüdə qalır. Ona görə də biz çox əziyyət çəkirik. Soyuducular işləmir, əhalinin  aldığı ərzaqlar hər gün atılır. Bu dəhşətdir. Bəs işıq idarəsi nə üçündür?..Səsimizə səs verən yoxdur. Xahiş edirik ki, bunu işıqlandırın. Məhəlləmizdə şəhid ailələri və qazilərimiz də bir neçə dəfə gedib, yazılı müraciət ediblər. Ancaq heç bir iş görülməyib".

Qarşı tərəfin mövqeyini dərc etməyə hazırıq.