Yeniyetməlik dövrü insan həyatında ən həssas və kritik mərhələlərdən biri sayılır. Bu yaş dövründə şəxsiyyət formalaşır və sosial məsuliyyətlər dərk edilir. Lakin ailə nəzarətinin zəifliyi və düzgün tərbiyə prinsiplərinin tətbiq olunmaması bəzi yeniyetmələrin yanlış yollara yönəlməsinə və hətta cinayətlər törətməsinə səbəb ola bilər.

Sumqayit.tv xəbər verir ki, "Referans"ın apardığı araşdırmaya əsasən, ölkədə 14-17 yaş arası yeniyetmələr tərəfindən törədilən cinayətlərin sayı 364-dür. Onlardan 46-sı ağır və xüsusilə ağır cinayətlərdir. Ən çox rast gəlinən cinayət isə oğurluqdur – 164 hal. Qəsdən sağlamlığa zərər vurma halları 15, adam öldürmə və adam öldürməyə cəhd isə 8 dəfə qeydə alınıb. Bu göstərici son 5 ildə maksimum səviyyəyə çatıb.

2019-2023-cü illərdə bu yaş qrupunda törədilən cinayətlərin sayında dalğalanmalar olub: 2019-cu ildə 323, 2021-ci ildə 251, 2022-ci ildə isə 311 hadisə qeydə alınıb. Cinayət törədən yeniyetmələrin əksəriyyəti oğlanlardır – 479 nəfər, cəmi 15-i isə qızdır.

Yeniyetmələrin cinayət törətdiyi bölgələr arasında Sumqayıt şəhəri də ön sıralardadır. Paytaxt Bakıda 89, Sumqayıtda isə bu yaş aralığında törədilən cinayətlərin sayı yüksəkdir. Abşeronda 19, Tovuzda 18, Qaxda 12, Ağdaşda 10 cinayət hadisəsi baş verib. Şirvan, Biləsuvar, Xaçmaz, İsmayıllı və Mingəçevirdə də bu hallar müşahidə edilib.

14-17 yaşlı uşaqlar arasında cinayətlərin 202-si işləməyən və oxumayan yeniyetmələr tərəfindən törədilib. Həmçinin 279 yeniyetmənin hər iki valideyni sağdır, 29 nəfərin bir valideyni var, 2 nəfər isə internat məktəbində böyüyüb. Cinayət törədən yeniyetmələrin 6-sı cinayət zamanı sərxoş vəziyyətdə olub.

Qarabağ bölgəsinin azad edilən rayonlarında isə cəmi 4 cinayət hadisəsi qeydə alınıb – Füzulidə 2 nəfər, Xocalı və Cəbrayılda 1 nəfər. Naxçıvanda isə bu yaş qrupunda 10 cinayət hadisəsi baş verib.

Yeniyetmələr arasında cinayətkarlığın artımı cəmiyyət üçün ciddi xəbərdarlıqdır. Bu məsələ ailə, təhsil və sosial qurumların üzərinə daha böyük məsuliyyət qoyur, çünki bu halların azaldılması cəmiyyətin təhlükəsizliyi üçün vacibdir.