Valideyn olmaq yalnız övlad dünyaya gətirmək deyil. Əsil valideyn, bir insanı tərbiyə edərək böyüdən, ona həyatın doğru yolunu göstərən şəxsdir. Mənim yeniyetmə çağlarımda qayğıma qalan, məni öz övladı kimi böyüdən və tərbiyə edən əmim Aftandil Camal oğlu İsmayılov, bu mənada mənim üçün təkcə doğma əmim deyil, həm də əvəzsiz bir müəllim, həyat yolumu işıqlandıran bir mayak olub.

Həyat Yolu və Peşə Fəaliyyəti

Aftandil İsmayılov 1 aprel 1938-ci ildə İrəvanın Karvansaray (Haqqıxlı) kəndində dünyaya göz açıb. Lakin onun həyat yolu Sumqayıtla sıx bağlı olub. Cəmi 26 yaşında gənc ikən Boru Yayma Zavodunda direktor müavini kimi çalışıb, daha sonra Azərbaycan Əlvan Metallurgiya Komitəsində kadrlar və əmək üzrə sədr müavini kimi fəaliyyət göstərib. Onun idarəçilik bacarığı, insanlara qayğısı və prinsipiallığı hər zaman təqdir edilib.

Bir Ailənin Sütunu

Aftandil əmim bir qardaş və əmi deyildi, o, bütün ailənin dayağı idi. Biz – qardaş və bacı uşaqları onun evində böyümüş, onun qayğısını görmüşük. O, təkcə maddi deyil, mənəvi olaraq da hər zaman ailəsinin, doğmalarının yanında olub. Böyük qardaşlarına məsləhətçi, kiçiklərə isə yol göstərən olub.

Çox yemişik yeməyini,

İtirmərik əməyini.

Halal elə çörəyini,

Aftandilim əmim mənim.

Unudulmaz Xatirə

Bu gün onun doğum günündə, onun xatirəsini dərin hörmətlə yad edirəm. Onun söylədiyi hər kəlmə, etdiyi hər bir yaxşılıq hafizəmizdə əbədi iz buraxıb. Hər zaman bizimlə qalan bu sətirlər qulağımda səslənir:

Babamızın əvəzisən,

Varlığımızın haqq səsisən.

Sən RAMİZİN ƏMİSİSƏN,

Aftandilim əmim mənim.

Aftandil əmi, sən bizə qoyub getdiyin dəyərlərlə, öyrətdiyin dərslərlə həmişə bizimləsən. Allah sənə rəhmət eləsin!

Cənnətdəki günün mübarək əziz əmim!

Ramiz İsmayılov

1-04-2025, 14:45 1 055