Bu gün 2016-cı il Aprel döyüşlərinin qəhrəmanı, “Murov qartalı” kimi tanınan şəhid polkovnik-leytenant Raquf Orucovun xatirəsinə anım tədbiri keçirilib.
Sumqayıt.tv xəbər verir ki, Raquf Orucov hərbi xidmət dövründə – xüsusilə Murovda yerləşən çətin mövqedə həyata keçirdiyi kəşfiyyat əməliyyatları ilə yadda qalıb və Azərbaycan Ordusunun tarixinə əfsanəvi komandir kimi düşüb. Onun fəaliyyəti həm zabit yoldaşları, həm də əsgərləri tərəfindən böyük hörmətlə qarşılanıb.

Raquf Orucovun göstərdiyi xidmətlər və uğurlu əməliyyatları ümummilli lider Heydər Əliyev və Prezident İlham Əliyev tərəfindən yüksək qiymətləndirilib.

Anım tədbiri Sumqayıt Şəhidlər Xiyabanında baş tutub. Tədbirin təşkilatçısı “Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli çıxış edərək Aprel döyüşlərinin tarixi əhəmiyyətindən və Raquf Orucovun döyüş yolundan danışıb.

Tədbirdə həmçinin aşağıdakı şəxslər iştirak ediblər:

Milli Məclisin deputatı Elman Məmmədov,

Ağdam İcra Hakimiyyəti başçısının birinci müavini Xəqani Nəzərov,

Sumqayıt İcra Hakimiyyətinin nümayəndələri,

Şəhidin həyat yoldaşı, “Zəfər” İctimai Birliyinin sədri Sevinc Orucova,

Qarabağ qazisi Ədalət Məhərrəmov,

Din xadimi Hacı Rövşən,

Aprel döyüşlərinin iştirakçısı, ehtiyatda olan baş leytenant Əhliyət Mehdiyev,

İctimaiyyət nümayəndələri və Raquf Orucovun adını daşıyan məktəbin şagirdləri.

Çıxış edənlər şəhidin şücaətindən, vətənpərvərliyindən və Aprel döyüşlərinin Azərbaycan tarixindəki önəmindən danışıblar.