Bu gün Sumqayıt şəhərində akademik Zərifə xanım Əliyevanın anadan olmasının 102-ci ildönümünə həsr olunmuş “Uğurlu qadın olmağın sirri” adlı şəhər tədbiri keçirilib.
Sumqayit.tv xəbər verir ki, tədbir Sumqayıt Şəhər İcra Hakimiyyəti, Ailə, Qadın və Uşaq Problemləri üzrə Dövlət Komitəsi, STP Şirkətlər Qrupu və Milli Məclisin deputatı Mehriban Vəliyevanın təşəbbüsü ilə Sumqayıt Muğam Mərkəzində təşkil olunub.

Tədbirdə Sumqayıt Şəhər İcra Hakimiyyətinin başçısı Zakir Fərəcov, tarix elmləri doktoru, professor Dilarə Seyidzadə, Ailə, Qadın və Uşaq Problemləri üzrə Dövlət Komitəsinin sədri Bahar Muradova, Milli Məclisin Ailə, qadın və uşaq məsələləri komitəsinin sədri, professor Hicran Hüseynova, deputatlar Tahir Mirkişili, Elnarə Akimova, Səbinə Salmanova, Zaur Şükürov, STP Şirkətlər Qrupunun nümayəndələri, həkimlər, müəllimlər və şəhər ictimaiyyəti iştirak edib.

Tədbirdən öncə qonaqlara sərgi təqdim olunub. Ardınca tədbir Ulu Öndər Heydər Əliyevin, akademik Zərifə Əliyevanın və Vətən uğrunda canlarından keçmiş şəhidlərin əziz xatirəsinin bir dəqiqəlik sükutla yad edilməsi və Dövlət Himninin səsləndirilməsi ilə başlayıb.

Açılış nitqi ilə çıxış edən Milli Məclisin deputatı Mehriban Vəliyeva Zərifə xanım Əliyevanın həyat və fəaliyyətindən bəhs edib, onun timsalında Azərbaycan qadınının nümunəvi dəyərlər daşıdığını vurğulayıb. O, STP Şirkətlər Qrupunun "Zərif mühəndislər" və "Sabahın gücü" layihələri çərçivəsində qadın mühəndislərin uğurlu fəaliyyətindən söz açaraq, uğurlu qadın olmağın zəhmət, sədaqət və insanlara sevgidən keçdiyini bildirib.

Tədbirdə Zərifə xanım Əliyevaya həsr olunmuş videoçarx nümayiş olunub.

Professor Dilarə Seyidzadə çıxışında Zərifə xanım və Ulu Öndər Heydər Əliyevlə bağlı xatirələrini bölüşüb.

Daha sonra Bahar Muradova Zərifə xanımın oftalmologiya sahəsində əldə etdiyi uğurlardan, yüksək insani keyfiyyətlərindən və qadınlara örnək həyat yolundan bəhs edib.

Milli Məclisin komitə sədri Hicran Hüseynova da çıxışında Zərifə Əliyeva haqqında xatirələrini bölüşərək onun ictimai və elmi fəaliyyətinə diqqət çəkib.

Tədbirin davamında "Sabahın gücü" layihəsinin məzunu Nərgiz Qafarova layihə və tədbir haqqında məlumat verib. Ardınca gənclərin sualları ətrafında panel müzakirəsi keçirilib. Paneldə deputatlar Səbinə Salmanova, Elnarə Akimova, Prezident təqaüdçüsü və əməkdar müəllim Ofelya Babayeva, əməkdar həkim Təranə Rəcəbli iştirak edərək gənclərin suallarını cavablandırıblar.

Sonda Sumqayıt Şəhər İcra Hakimiyyətinin başçısı Zakir Fərəcov çıxış edərək Zərifə xanım Əliyevanın Azərbaycan qadınları üçün məktəb olan həyat yolundan danışıb, gənclərə dəyərli tövsiyələr verib.

Tədbir Sumqayıt Musiqi Kollecinin təqdim etdiyi bədii proqramla başa çatıb.

25-04-2025, 01:12 165