Bakıda yəhudi sinaqoquna qarşı terror aktı planlaşdırmaqda ittiham olunan Sumqayıt şəhər sakini, 18 yaşlı Abdulla Əliyevin cinayət işi üzrə məhkəmə prosesi başlayıb.

Sumqayit.tv  xəbər verir ki, bu gün Bakı Ağır Cinayətlər Məhkəməsində hakim Aygün Qurbanovanın sədrliyi ilə hazırlıq iclası keçirilib. İclas zamanı təqsirləndirilən şəxsin anket məlumatları dəqiqləşdirilib və işin baxışa verilməsi barədə qərar qəbul olunub. Məhkəmə baxış iclası 2025-ci il iyunun 2-nə təyin edilib.

İttihama görə, Sumqayıtda yaşayan Abdulla Əliyev "İŞİD Xorasan" adlı terror təşkilatına bağlılıqda ittiham olunur. Araşdırmalara əsasən, o, ötən ilin dekabrın 28-də Bakı şəhərində yerləşən “Bakı Dağ Yəhudiləri Sinaqoqu”na “Molotov kokteyli” və digər silah qismində əşyalarla hücum etməyə hazırlaşıb.

Hadisə Dövlət Təhlükəsizliyi Xidməti tərəfindən həyata keçirilən operativ əməliyyat zamanı qarşısı alınaraq, Abdulla Əliyev saxlanılıb. Onun üzərindən və idarə etdiyi avtomobildən odlu silah qismində istifadə oluna biləcək müxtəlif əşyalar aşkarlanaraq götürülüb.

Abdulla Əliyevə qarşı Cinayət Məcəlləsinin terrorçuluq və cinayətkar birlikdə iştirakla bağlı aşağıdakı maddələri ilə ittiham irəli sürülüb:

• 28, 214.2.1 – qabaqcadan əlbir olan bir qrup şəxs tərəfindən terrorçuluq;

• 28, 214.2.3 – odlu silahdan istifadə etməklə terrorçuluq;

• 28, 214.2.6 – dini radikalizm və dini fanatizm zəminində terrorçuluq;

• 218.2 – cinayətkar birlikdə iştirak.

Qeyd edək ki, bu, son illərdə Sumqayıtdan radikal dini motivlərlə terrora cəhd göstərilmiş ən ciddi fakt kimi qiymətləndirilir.

20-05-2025, 12:34 59