Dünən Xankəndidə regionun gələcəyi üçün strateji əhəmiyyət daşıyan tarixi bir görüş baş tutub. Azərbaycan Respublikasının Prezidenti İlham Əliyev, Türkiyə Respublikasının Prezidenti Rəcəb Tayyib Ərdoğan və İran İslam Respublikasının Prezidenti Məsud Pezeşkianın toplantı zamanı üçlü şəkildə addımlamasını dünya üçün ciddi mesaj kimi də qiymətləndirmək olar.

Görüş zamanı çəkilən fotoda Azərbaycan lideri İlham Əliyev solda, İran lideri Məsud Pezeşkian mərkəzdə, Türkiyə lideri Rəcəb Tayyib Ərdoğan isə sağda yer alıb. Bu görüntü sadəcə bir kadr deyil – burada diplomatik balans, regional güc münasibətləri və qarşılıqlı hörmət açıq şəkildə əksini tapır.

Görüşün məhz Xankəndidə keçirilməsi Azərbaycan üçün ciddi siyasi mesaj daşıyır. Uzun illərdən sonra bu şəhərin rəsmi səviyyədə bölgə liderlərini qəbul etməsi, Azərbaycanın ərazi bütövlüyü və suverenliyinin tanınması baxımından mühüm hadisədir. İranın bu görüşə qatılması isə Cənubi Qafqazda yeni diplomatik səhifənin açıldığını göstərir.

Bədən dili üzərindən mesajlar

İlham Əliyev – Öz ərazisində inamlı və güclü lider. Çöhrəsindəki sakitlik və qətiyyət Azərbaycanın suverenliyinin təminatçısı mövqeyini ifadə etməklə, həm və sakit güc rolunda olduğunu ortaya qoyur.

Məsud Pezeşkian – Yeni prezident kimi diplomatik təbəssümü ilə yumşaq və açıq diplomatiya nümayiş etdirməklə, iki türk liderin arasında yer alaraq mərkəzləşdirici və tarazlı siyasətə adaptasiya etmək istəyini göstərir.

Rəcəb Tayyib Ərdoğan – Ciddi və nəzarət edən baxışı ilə qardaş ölkənin təcrübəli və siyasi lider obrazı yaradır. Eyni zamanda onun müdafiəçi, dəstəkləyici və yönləndirici bir lider olduğunu sezmək mümkündür.

Bu tarixi görüş və ortaq görüntü, yalnız diplomatik jest deyil, həm də regionda sabitliyin, əməkdaşlığın və güc balansının yenidən formalaşmasının simvoludur. Azərbaycan, Türkiyə və İran liderlərinin Xankəndidə bir araya gəlməsi, bölgənin gələcəyinə dair ümidverici siyasi mesaj olaraq qiymətləndirilir.

Müəllif: Sumqayit.tv Analitik şöbəsi

5-07-2025, 14:17 295