Sumqayıt şəhərində yaşıllıqların qorunması ilə bağlı aparılan nəzarət tədbirləri çərçivəsində növbəti qanunsuzluq halı qeydə alınıb.

Sumqayit.tv xəbər verir ki, Ekologiya və Təbii Sərvətlər Nazirliyinin Dövlət Ekoloji Təhlükəsizlik Xidmətindən verilən məlumata görə, şəhərin Mirzə Ələkbər Sabir küçəsi, 28 ünvanında ağacların və kolların qanunsuz şəkildə kəsilməsi faktı aşkar edilib.

Aparılmış araşdırmalar nəticəsində məlum olub ki, yaşıllıqların məhv edilməsi nəticəsində təbiətə 191 700 manat dəyərində ziyan vurulub. Bu məbləğ cinayət xarakterli olduğundan, toplanmış materiallar hüquqi qiymət verilməsi üçün hüquq-mühafizə orqanlarına təqdim edilməkdədir.

Nazirlik vətəndaşlara müraciət edərək təbiətə qarşı yönələn bu kimi halların qarşısının alınmasında ictimai dəstəyin vacibliyini vurğulayıb və belə faktlarla rastlaşan hər kəsi məlumat verməyə çağırıb.