Sumqayıt şəhərində içməli su israfı problemi gündəmə gəlib. Səməd Vurğun küçəsi ilə İnşaatçılar küçəsinin kəsişməsində – işıqforun yaxınlığında yaşayan sakinlər “Sumqayıt TV” redaksiyasına şikayət məktubu və video göndərərək ərazidə baş verən su sızmasından narahat olduqlarını bildiriblər.

Sakinlərin sözlərinə görə, artıq uzun müddətdir ki, həmin ərazidə içməli su küçələrə axıdılır. Onların dəfələrlə Sumqayıt Su Kanal İdarəsinə etdikləri müraciətlər isə nəticəsiz qalıb.

“Su borusunun ağzına şlank keçirsək də, axının qarşısını ala bilmirik. Suyun hər yana yayılması palçıq əmələ gətirib. Həyətyanı sahəyə keçmək belə çətinləşib,” – deyə sakinlər bildirir.

Məsələ daha bir narahatlıq doğurur: Prezidentin suya qənaət və resurslardan səmərəli istifadə ilə bağlı verdiyi göstərişlər fonunda bu cür israfın hələ də aradan qaldırılmaması, aidiyyəti qurumun məsuliyyətsizliyi kimi qiymətləndirilir.

Redaksiyamız məsələni diqqətdə saxlayır və Sumqayıt Su Kanal İdarəsinin rəsmi mövqeyini öyrənməyə hazırıq.

Video göruntü: Sumqayıt TV YouTube kanalımızda