Rusiya Hərbi Kosmik Qüvvələri Ukraynanın Çerniqov vilayətinə “İsgəndər-M” raketləri ilə zərbələr endirib. Bu barədə məlumatı Rusiya Müdafiə Nazirliyi yayıb.

Zərbələr, ABŞ Prezidenti Donald Trampın müharibənin dayandırılması üçün Moskvaya verdiyi qısa möhlət fonunda həyata keçirilib. Lakin Ağ Evin bəyanatlarına rəğmən, Kreml hücumları daha da intensivləşdirir.

Bəs bu vəziyyət nə ilə bağlıdır? Rusiya necə bir mesaj verir və ümumi proses hansı istiqamətə yönəlir?

Globalinfo.az-a danışan politoloq Elçin Abdullayev bildirib ki, Rusiyanın Ukraynanın Çerniqov vilayətinə endirdiyi raket zərbələri bir neçə mühüm mesajın verilməsi kimi qiymətləndirilməlidir:

“Birincisi, bu hücumda istifadə olunan “İsgəndər-M” tipli raketlər yüksək dəqiqliklə strateji hədəfləri məhv edən silahlardır. Moskva məhz bu cür raketlərdən istifadə etməklə Ukraynaya və Qərbə açıq mesaj verir: “Regionda hələ də güc sahibiyik və heç bir təzyiqə, sanksiyalara baxmayaraq istədiyimizi edə bilərik. Biz əsas oyunçuyuq”.

İkincisi, Donald Trampın Rusiya Prezidenti Vladimir Putinə 50 gün vaxt verməsi və daha sonra bu müddəti azaltması ilə bağlı açıqlamaları fonunda Rusiya daha sərt mövqe sərgiləməyə başlayıb və Ukraynaya zərbələrin intensivliyini artırıb.

Üçüncüsü, Rusiya rəsmiləri anlayırlar ki, Ukrayna meydanında təkdirlər. Bu səbəbdən “öz göbəyimizi özümüz kəsməliyik” prinsipindən çıxış edərək, Kiyevi daha güclü və ardıcıl zərbələrlə tezliklə təslim olmağa məcbur etməyə çalışırlar.

Lakin bu prosesin qısa müddətdə başa çatacağını düşünmürəm. Putinin hücumları intensivləşdirməkdə əsas məqsədi Qərbin Ukraynaya olan dəstəyini zəiflətmək və yardım xəttini kəsməkdir. Nəticə etibarilə, artan hücumlar ya döyüş meydanında qələbəyə aparan yolu açmaq, ya da Ukrayna və Qərbi Rusiyanın diktə etdiyi reallıqlarla üz-üzə qoymaq məqsədi daşıyır”.

Safura Bənnayeva
Globalinfo.az