Vətən Müharibəsinin qəhrəman döyüşçüsü Şuşa uğrunda gedən döyüşlərdə şəhid olub.
Sumqayit.tv xəbər verir ki, bu gün – 5 avqust, Vətən müharibəsi şəhidi Emil Vaqif oğlu İsgəndərovun doğum günüdür. O, 1990-cı ilin bu günü Sumqayıt şəhərində, hərbçi ailəsində dünyaya gəlib.
Orta təhsilini şəhərin 10 saylı tam orta məktəbində alan Emil İsgəndərov 2011-ci ildə Quba rayonu ərazisində yerləşən N saylı hərbi hissədə Daxili Qoşunların Xüsusi Vasitələrin Tətbiqi (XVT) sahəsində müddətdən artıq hərbi xidmətə başlayıb. 2015-ci ildə isə gizir rütbəsi alıb.
Emil İsgəndərov 2020-ci ilin sentyabrında başlayan Vətən müharibəsində fəal iştirak edib. Cəbrayıl, Hadrut, Qubadlı və Şuşa istiqamətlərində gedən döyüşlərdə qəhrəmancasına vuruşub.
Şuşa uğrunda gedən döyüşlərdə qolundan iki güllə yarası almasına baxmayaraq, geri çəkilməyib, döyüş yoldaşlarını tək buraxmayıb. Bir müddət sonra yanına düşən minaatan mərmisi nəticəsində ağır şəkildə sol ayağından yaralanıb.
Döyüş yoldaşları tərəfindən Şuşa şəhərinə aparılsa da, qan itirmə səbəbindən şəhid olub.
Prezident İlham Əliyevin müvafiq sərəncamları ilə şəhid Emil İsgəndərov ölümündən sonra aşağıdakı medallarla təltif olunub:
Ona “Vətən uğrunda” medal, “Şuşanın azad olunmasına görə” medal və “Hərbi xidmətlərdə fərqlənməyə görə” III dərəcəli medalı verilib.
Qeyd edək ki, şəhid Emil İsgəndərov ailəli olub, onun İbrahim və Nicat adlı iki azyaşlı oğlu Vətənə əmanət qalıb.