Sumqayıt.tv-yə daxil olan çoxsaylı vətəndaş müraciətləri əsasında məlum olub ki, şəhərdə fəaliyyət göstərən 7 nömrəli marşrut xətti üzrə hərəkət edən bəzi avtobuslarda kondisioner sistemi işlək vəziyyətdə deyil.
İsti hava şəraitində sərnişinlərin narahatlığına səbəb olan bu problem, şikayətçilərin sözlərinə görə, artıq uzun müddətdir ki, davam edir. Bəzi sürücülər kondisionerin “işləmədiyini” deyərək onu qoşmaqdan imtina edirlər.
Sumqayit.tv olaraq məsələ ilə bağlı rəsmi sorğumuzu həm Azərbaycan Yerüstü Nəqliyyat Agentliyinə (AYNA), həm də Sumqayıt Şəhər İcra Hakimiyyətinə göndərdik. Sorğuda 7 nömrəli marşrut üzrə avtobusların ümumi sayı, kondisionerli nəqliyyat vasitələrinin faizi, texniki yoxlamaların nəticələri, sürücülərə qarşı tədbirlər və yaxın müddətdə parkın yenilənməsi barədə suallar yer alıb.
Sorğumuza cavab olaraq, Sumqayıt şəhər İcra Hakimiyyətinin mətbuat xidmətinin rəhbəri Eyvaz Qocayev bildirib ki, şəhərdə ictimai nəqliyyat parkının müasirləşdirilməsi istiqamətində ardıcıl tədbirlər görülür:

 
“Cari il ərzində yeni və müasir tələblərə cavab verən avtobuslar gətirilib və bu nəqliyyat vasitələri kondisioner sistemi ilə tam təchiz olunub. Kondisionerlərin işlək vəziyyətdə saxlanılması üçün monitorinq qrupları tərəfindən gündəlik yoxlamalar aparılır. Vətəndaşların rahatlığını təmin etmək məqsədilə daşıyıcı şirkətlər qarşısında konkret tələblər qoyulub. Kondisionerin işləmədiyi hallar aşkarlanarsa, məsul şəxslərlə bağlı tədbirlər görülür. Hazırda nəzarət daha da gücləndirilib.”
AYNA-nın mövqeyi isə hələlik ictimaiyyətə açıqlanmayıb. Qurumun mətbuat katibi Tural Orucova və AYNA-nın rəsmi Facebook səhifəsinin mesaj bölməsinə yazılı müraciət göndərmişik. Lakin artıq 4 gündür nə yazılı, nə də şifahi cavab verilib.
P.s AYNA-nın bu mövzuda susqunluğu yalnız ictimaiyyətin narahatlığını artırır. Media sorğularına vaxtında cavab verməmək, xüsusilə də vətəndaşların sağlamlığı və rahatlığı ilə bağlı bir məsələdə, məsuliyyətli dövlət qurumunun imicinə uyğun deyil.
Əgər nəzarət və texniki yoxlamalar aparılırsa, nəticələrin ictimaiyyətlə bölüşülməməsi şəffaflıq prinsiplərinə ziddir.
Sumqayit.tv məsələni diqqətdə saxlayacaq və AYNA-dan gələcək rəsmi cavabı ictimaiyyətə çatdıracaq.

Məleykə Xankişiyeva, Sumqayit.tv