Sumqayıt şəhərinin 12-ci mikrorayon ərazisində yaşayan sakinlər yolun təmiri ilə bağlı yaranmış vəziyyətdən narazıdırlar.

Sakinlərin Sumqayit.tv-yə göndərdiyi müraciətdə bildirilir ki, ərazidə aparılan işlərə baxmayaraq, yol uzun müddətdir tam bərpa olunmayıb. Onların sözlərinə görə, artıq iki aya yaxındır davam edən problem həm nəqliyyat vasitələrinin hərəkətində çətinlik yaradır, həm də gündəlik həyatda narahatlığa səbəb olur.

Şikayətçilər qeyd edirlər ki, 12-ci mikrorayonda, 10A marşrut xəttinin keçdiyi ərazidə, qapalı dayanacağın qarşısında yolun qazılmış hissəsi uzun müddətdir bağlı vəziyyətdə qalıb. İddialara görə, həmin ərazidə su xətlərində tez-tez nasazlıqlar yaranır və sakinlər bəzi hallarda problemi öz vəsaitləri hesabına aradan qaldırmağa məcbur olurlar.

Sakinlərin sözlərinə görə, əraziyə texnika gətirilsə də, son bir ay ərzində işlərdə nəzərəçarpacaq irəliləyiş müşahidə olunmur. Onlar bildirirlər ki, texnikanın ərazidə olmasına baxmayaraq, təmir-bərpa işləri faktiki olaraq dayandırılıb.

Vətəndaşlar aidiyyəti qurumlardan problemin qısa zamanda həll olunmasını, yolun bərpa edilərək sakinlərin istifadəsinə verilməsini xahiş edirlər.

Məsələ ilə bağlı qarşı tərəfin mövqeyini dərc etməyə hazırıq.

10-06-2026, 18:54 78