Sumqayıtın 52-ci məhəlləsində kanalizasiya xəttinin dolması nəticəsində çirkab suları həyətlərə axır. Sakinlər problemin həlli üçün aidiyyəti qurumlara müraciət etdiklərini bildirirlər.

Sakinlərin Sumqayit.tv-yə göndərdikləri müraciətə görə, artıq 3 gündür ümumi kanalizasiya xətti dolub və çirkab suları yaşayış evlərinin həyətlərinə axır. Hazırda vəziyyət daha da ağırlaşaraq bəzi evlər üçün təhlükə yaratmağa başlayıb.

Müraciət müəlliflərinin sözlərinə görə, problemlə bağlı aidiyyəti quruma məlumat verilib. Onlar 012 348 42 70 nömrəsi ilə əlaqə saxladıqlarını və ərazidəki vəziyyəti görüntülü şəkildə nümayiş etdirdiklərini bildiriblər. Sakinlərə müraciətin qeydiyyata alındığı və əməkdaşların əraziyə baxış keçirəcəyi bildirilsə də, indiyədək hər hansı müdaxilə olunmadığı iddia edilir.

Sakinlər qeyd edirlər ki, yay mövsümündə kanalizasiya sularının açıq şəkildə ətrafa yayılması həm antisanitar vəziyyət yaradır, həm də müxtəlif xəstəliklərin yayılması riskini artırır.

Məsələ ilə bağlı aidiyyəti qurumların mövqeyini dərc etməyə hazırıq.

Qeyd edək ki, sakinlər tərəfindən Sumqayit.tv-yə hadisəni əks etdirən videogörüntülər də təqdim olunub.

13-06-2026, 20:52 103