Hər il iyunun 26-sı Azərbaycanda xüsusi qürur və ehtiram hissi ilə qeyd olunur. Bu tarix təkcə təqvimdə qeyd olunan rəsmi bayram deyil, həm də dövlətçiliyimizin, müstəqilliyimizin və milli təhlükəsizliyimizin əsas dayaqlarından biri olan Azərbaycan Ordusunun şərəf günüdür. 1918-ci il iyunun 26-da Azərbaycan Xalq Cümhuriyyəti tərəfindən milli ordunun yaradılması haqqında qərarın qəbul edilməsi müasir Azərbaycan Silahlı Qüvvələrinin təməlini qoydu. Bu tarix sonradan ümummilli lider Heydər Əliyevin 1998-ci il tarixli fərmanı ilə rəsmi olaraq Silahlı Qüvvələr Günü elan edildi.
Azərbaycan Ordusu ötən bir əsrdə çətin və şərəfli inkişaf yolu keçib. Müstəqilliyin ilk illərində yaşanan ağır sınaqlardan başlayaraq peşəkar, müasir və yüksək döyüş qabiliyyətinə malik ordu modelinin formalaşdırılması istiqamətində mühüm addımlar atılıb. Son illərdə həyata keçirilən hərbi islahatlar, müasir silah və texnologiyaların tətbiqi, peşəkar kadr hazırlığı və beynəlxalq əməkdaşlıq Azərbaycan Silahlı Qüvvələrini regionun ən güclü ordularından birinə çevirib.
Azərbaycan Ordusunun qüdrəti 2020-ci ildə baş vermiş 44 günlük Vətən müharibəsində bütün dünyaya nümayiş etdirildi. Müzəffər Ali Baş Komandanın rəhbərliyi ilə həyata keçirilən uğurlu hərbi əməliyyatlar nəticəsində ölkəmizin ərazi bütövlüyü böyük ölçüdə bərpa olundu. Ardınca keçirilən lokal antiterror tədbirləri ilə Azərbaycanın bütün suveren ərazisində konstitusiya quruluşu tam təmin edildi. Bu uğurlar yalnız hərbi qələbə deyil, həm də xalq–ordu birliyinin, dövlət iradəsinin və milli həmrəyliyin parlaq təzahürü kimi tarixə düşdü.
Bu gün Azərbaycan əsgəri təkcə sərhədlərimizi qoruyan hərbçi deyil. Onlar dövlətimizin müstəqilliyinin, xalqımızın təhlükəsizliyinin və gələcəyimizin etibarlı təminatçısıdır. Hər bir zabit və əsgərin xidmətinin arxasında böyük məsuliyyət, vətən sevgisi və müqəddəs and dayanır.
Silahlı Qüvvələr Günü həm də şəhidlərimizi ehtiramla anmaq, qazilərimizin fədakarlığını yüksək qiymətləndirmək və hərbi qulluqçularımıza minnətdarlığımızı ifadə etmək günüdür. Məhz onların qəhrəmanlığı sayəsində Azərbaycan bu gün regionun söz sahibi olan güclü dövlətlərindən biri kimi inkişafını davam etdirir.
26 İyun bizə bir həqiqəti bir daha xatırladır: güclü dövlətin əsas dayaqlarından biri güclü ordudur. Azərbaycan Ordusu isə təkcə silahı ilə deyil, peşəkarlığı, döyüş ruhu və xalqın ona olan sonsuz inamı ilə seçilir.
Sumqayıt TV kollektivi olaraq Silahlı Qüvvələr Günü münasibətilə bütün hərbi qulluqçularımızı, ehtiyatda olan zabit və əsgərlərimizi, qazilərimizi və şəhid ailələrini ürəkdən təbrik edir, Vətənimizin keşiyində dayanan hər bir qəhrəmana möhkəm can sağlığı, şərəfli xidmət və yeni uğurlar arzulayırıq. Yaşasın qüdrətli Azərbaycan Ordusu! Yaşasın Azərbaycan!
Bu gün, 09:53
6
