Azərbaycan Silahlı Qüvvələrinin yaradılmasının 108-ci ildönümü münasibətilə Sumqayıt şəhərində təntənəli tədbir təşkil olunub.

Sumqayit.tv xəbər verir ki, bayram münasibətilə Sumqayıt Bulvarında Azərbaycan Ordusunun hərbi qulluqçularının iştirakı ilə təntənəli yürüş və hərbi orkestrin nümunəvi çıxışları keçirilib.

Marş sədaları altında nizami addımlayan hərbi qulluqçular tədbir iştirakçılarında qürur hissi yaradıb. Hərbi orkestrin ifasında səsləndirilən vətənpərvərlik ruhlu musiqilər isə bulvara toplaşan şəhər sakinləri tərəfindən böyük maraqla izlənilib və alqışlarla qarşılanıb.

Tədbir zamanı yüzlərlə Sumqayıt sakini və şəhərin qonaqları Azərbaycan Ordusunun peşəkarlığını və yüksək nizam-intizamını əks etdirən yürüşü izləyərək Silahlı Qüvvələr Gününün sevincini bölüşüblər.

Qeyd edək ki, 26 İyun – Silahlı Qüvvələr Günü münasibətilə analoji yürüşlər və hərbi orkestr proqramları ölkənin digər şəhərlərində, o cümlədən Bakı, Gəncə, Naxçıvan, Bərdə, Xankəndi, Laçın və Şuşada da təşkil olunub.

26-06-2026, 12:05 67