26 İyun – Azərbaycan Respublikasının Silahlı Qüvvələri Günü münasibətilə Sumqayıt Dövlət Dram Teatrında "Zəfər tarixi yazmış şanlı ordumuz" adlı tədbir keçirilib.

Sumqayit.tv xəbər verir ki, Sumqayıt Şəhər İcra Hakimiyyəti və Yeni Azərbaycan Partiyası Sumqayıt şəhər təşkilatının birgə təşkilatçılığı ilə keçirilən tədbirdə şəhər rəhbərliyi, millət vəkilləri, idarə, müəssisə və təşkilatların nümayəndələri, şəhid ailələri, qazilər, hərbi qulluqçular və ictimaiyyət nümayəndələri iştirak ediblər.

Tədbiri giriş sözü ilə açan Yeni Azərbaycan Partiyası Sumqayıt şəhər təşkilatının sədri Ramiz Hüseynov Silahlı Qüvvələr Gününün Azərbaycan xalqı üçün xüsusi əhəmiyyət daşıdığını bildirib. O qeyd edib ki, Prezident, Silahlı Qüvvələrin Ali Baş Komandanı İlham Əliyevin rəhbərliyi ilə Azərbaycan Ordusu son illərdə böyük inkişaf yolu keçərək regionun ən güclü ordularından birinə çevrilib.

Ramiz Hüseynov çıxışında 44 günlük Vətən müharibəsində qazanılan tarixi Zəfərin Azərbaycan əsgərinin peşəkarlığının, xalq–ordu birliyinin və dövlətimizin gücünün ən parlaq təzahürü olduğunu vurğulayıb. O bildirib ki, əldə olunan Qələbə Azərbaycan Ordusunun yüksək döyüş hazırlığını və xalqın öz ordusuna olan sarsılmaz inamını bütün dünyaya nümayiş etdirib.

Tədbir çərçivəsində Azərbaycanın Milli Qəhrəmanı Natiq Qasımovun xatirəsinə həsr olunmuş "Ölməz" qəhrəmanlıq dramı nümayiş etdirilib. Tamaşada Milli Qəhrəmanın keçdiyi şərəfli həyat yolu, Vətənə sonsuz sədaqəti və göstərdiyi qəhrəmanlıq nümunələri səhnə dili ilə tamaşaçılara təqdim olunub.

İştirakçılar tamaşanı böyük maraqla izləyərək onun gənc nəslin vətənpərvərlik ruhunda tərbiyəsində, şəhidlərimizin və qəhrəmanlarımızın şərəfli ömür yolunun təbliğində mühüm əhəmiyyət daşıdığını bildiriblər.

Tədbir Azərbaycan Ordusunun şanlı tarixinin, hərbçilərimizin qəhrəmanlığının və Vətən uğrunda canından keçmiş şəhidlərimizin əziz xatirəsinin dərin ehtiramla yad olunması ilə başa çatıb.

Bu gün, 14:18 9