Şəhərinin 4-cü mikrorayon ərazisində fəaliyyət göstərən Sumqayıt Poçt Filialının 5 saylı poçt şəbəkəsində iki gün əvvəl maraqlı vəziyyət yaşanıb.

Sumqayit.tv əməkdaşı təcili teleqram göndərmək məqsədilə sözügedən poçt şöbəsinə müraciət edib. Teleqramın mətni əməkdaş tərəfindən yazılıb və qəbul masasında əyləşən əməkdaşa təqdim olunub.

Lakin mətn kompüterə köçürülərkən şöbədə elektrik enerjisi kəsilib. Nəticədə teleqramın rəsmiləşdirilməsi prosesi yarımçıq qalıb.

Əməkdaşımızın müşahidəsinə görə, elektrik kəsintisindən sonra şöbədə fəaliyyətin davam etdirilməsi üçün alternativ enerji mənbəyi – generator və ya digər ehtiyat enerji sistemi mövcud olmayıb. Bu səbəbdən xidmətin bərpası yalnız elektrik enerjisinin verilməsindən sonra mümkün olub.

Yaranan vəziyyət bir sıra suallar doğurur. Vətəndaşlara fasiləsiz xidmət göstərməli olan dövlət qurumlarında elektrik enerjisi kəsildiyi hallarda xidmətin davam etdirilməsi üçün ehtiyat enerji sistemləri nəzərdə tutulubmu? Əgər nəzərdə tutulubsa, sözügedən şöbədə niyə istifadə olunmadı?

Sumqayit.tv məsələ ilə bağlı Azərpoçtun mövqeyini də öyrənməyə və cavabını dərc etməyə hazırdır.

1-07-2026, 15:32 96