Sumqayıtın 40-cı məhəlləsində yaşayan sakinlər məişət tullantılarının yığılması ilə bağlı narazılıqlarını bildirirlər.

Sumqayit.tv-yə müraciət edən sakinlərin sözlərinə görə, ərazi vaxtaşırı təmizlənsə də, qısa müddət sonra yenidən tullantılar yığılır. Onlar iddia edirlər ki, yaxınlıqdakı bəzi obyektlər də məişət tullantılarını həmin əraziyə atır.

Sakinlər bildirirlər ki, zibil maşını konteynerləri boşaltsa da, konteynerlərin ətrafına səpələnmiş tullantılar yerində qalır. Bu isə xüsusilə isti havalarda xoşagəlməz qoxunun yaranmasına səbəb olur.

“Bura 40-cı məhəllədir. Arada gəlib təmizləyirlər, amma yenə də eyni vəziyyət yaranır. Ətrafdakı obyektlərin hamısı tullantıları bura gətirib atır. Zibil maşını yalnız konteyneri boşaldır, yerdə qalan zibillər isə yığışdırılmır. Qoxudan pəncərəni açmaq mümkün olmur”, – deyə sakinlər bildiriblər.

Müraciətə əsasən, söhbət 40-cı məhəllədə, Hərbi Komissarlığın qarşısında yerləşən ərazidən gedir. Sakinlər problemin aradan qaldırılması və ərazidə mütəmadi təmizlik işlərinin aparılmasını xahiş edirlər.

Qeyd: Məsələ ilə bağlı Sumqayıt Şəhər Təmizlik Departamentinin mövqeyini dərc etməyə hazırıq.

Bu gün, 17:31 43