Sakinlər intervalların uzun olmasından şikayətlənirlər

Sumqayit.tv-yə Sumqayıt şəhərində fəaliyyət göstərən 12 nömrəli marşrut xətti ilə bağlı vətəndaş müraciəti daxil olub.

Şikayətçilərin sözlərinə görə, İsuzu markalı avtobusların xidmət göstərdiyi marşrutda intervallar normadan artıqdır. Onlar bildirirlər ki, dayanacaqlarda bəzən 30-40 dəqiqə avtobus gözləməli olurlar.

Sakinlər qeyd edirlər ki, problem xüsusilə səhər və axşam saatlarında, işə və təhsil müəssisələrinə gediş-gəliş vaxtı daha qabarıq hiss olunur.

Onların iddiasına görə, bu saatlarda xətdə avtobusların sayı kifayət etmir. Nəticədə gələn avtobuslarda sərnişin sıxlığı yaranır və bir çox vətəndaş nəqliyyata minməkdə çətinlik çəkir.

Müraciət müəllifləri 12 nömrəli marşrut xəttində avtobusların sayının artırılmasını və intervalların qısaldılmasını xahiş edirlər.

Qeyd: Yazıda yer alan iddialar vətəndaş müraciətinə əsaslanır. Sumqayit.tv məsələ ilə bağlı aidiyyəti qurumun mövqeyini dərc etməyə hazırdır.

6-07-2026, 21:12 47