Sumqayit.tv-nin redaksiyasına şikayət daxil olub. Belə ki Sumqayıt sakinləri Sumqayıt-Bakı avtobuslarında olan vəziyyətdən narazıdırlar. Sakinlərin dediyinə görə avtobus sürücüləri hər zaman 0.80-1 manata apardıqları yolu indi 1.50 və ya 2 manata aparırlar. Onlar həm də 501 nömrəli marşrutun olmamağı ilə bağlı öz narazılıqlarını redaksiyamıza bildiriblər və bu məsələni işıqlandırmağımızı xahiş edirlər. Məsələ ilə bağlı öncə Sumqayıt şəhər Nəqliyyat Departamentinin rəis müavini Tofiq Saydumov​ ​​​ilə əlaqə saxladıq. Nəqliyyat rəsmisi sualımıza cavab olaraq bildirdi ki, “Sumqayıt-Bakı avtobus və taksiləri bizim səlahiyyətimizdə deyil. Bizim qurum şəhərdaxili marşrutların fəaliyyətini tənzimləyir. O səbəbdən məsələ ilə bağlı heçnə deyə bilmərəm.” Daha sonra Dövlət Avtomobil Nəqliyyat Xidmətinin Sumqayıt Regional şöbəsinin rəis vəzifəsini müvəqqəti icra edən Ədalət Ağayev​ ​​​ilə əlaqə saxladıq. Ədalət müəllim bizə bildirdi ki, sərnişinlər 501 və 503 nömrəli marşrutlardan demək olar ki, istifadə etmədikləri üçün həmin xətlərdə işləyən avtobuslar iflic vəziyyətə düşüb. “Bu səbəbdən onlar artıq öz fəaliyyətini davam etdirə bilmirlər. Dediyiniz digər avtobus və mikroavtobuslar isə qanunsuz işləyirlər. Biz bununla bağlı dəfələrlə Dövlət Yol Polisi şöbəsinə, Vergilər İdarəsinə məktublar yazmışıq. Hətta 10-15 gün bundan qabaq da müraciət etmişik ki, bu məsələnin qarşısı alınsın.”. Rəis əvəzi onu da əlavə etdi ki, “Qanunsuz fəaliyyət göstərən bu nəqliyyat vasitələrinə heç bir qanuni sənəd verilməyib, elə bir marşrut xətti yoxdur. Fürsətdən istifadə edərək biz sərnişinlərə bir daha sizin vasitənizlə bildirmək istəyirik ki, 501 və 503 nömrəli avtobusların xidmətindən yararlansınlar.“

Müxbir: Şəbnəm Məşiyeva