Rusiya Ermənistan rəhbərliyinin bəyanatlarını izləyir, öz əməli addımlarını planlaşdırarkən bunları nəzərə alacaq.
Sumqayit.tv xəbər verir ki, bunu Rusiya xarici işlər naziri Sergey Lavrov deyib.
O vurğulayıb ki, Rusiya, Azərbaycan və Ermənistanın üçtərəfli bəyanatları əsasında İrəvanla Bakı arasında nizamlanmanın alternativi yoxdur.
“İrəvanda son aylarda Qarabağ münaqişəsinin kəskinləşməsinin Ermənistan üçün uğursuz nəticələrinə görə Moskvaya qarşı təxribatçı fikirlər səslənir. Hər gün Ermənistan rəhbərliyinin ağzından eşidilən həmin bəyanatlar bizi əslində nə baş verdiyini və əməli addımlarımızda bunu necə nəzərə alacağımızı düşünməyə vadar edir”, - Lavrov bildirib.
Rusiyalı nazir Bakı ilə İrəvan arasında müxtəlif Qərb ölkələrinin vasitəçiliyi ilə təşkil olunan təmaslara diqqət çəkib.
“Azərbaycanlı həmkarımdan (Ceyhun Bayramov) təəssüratlarını soruşdum. Cavabları məndədir”, - Lavrov əlavə edib.
Eyni zamanda, nazir söyləyib ki, Bakıda bütün məsələləri Rusiya, Azərbaycan və Ermənistanın üçtərəfli bəyanatlarına uyğun olaraq həll etməyə hazır olduqlarını təsdiq edirlər:
“Məncə, irəliləyiş üçtərəfli sazişlərin nə dərəcədə ədalətlə yerinə yetirilməsindən asılı olacaq”.
Rusiyanın baş diplomatı onu da qeyd edib ki, Moskva həm regionda bütün kommunikasiyaların açılması, həm sərhədlərin delimitasiyası, həm də müvafiq olaraq sülh müqaviləsinin hazırlanması ilə bağlı yardım göstərməyə davam etməyə hazırdır.
Lavrov xatırladıb ki, Rusiya bu məsələnin həllinə kömək etmək üçün xüsusi tapşırıqlar üzrə səfir təyin edib, o, artıq Bakıda olub, İrəvana səfər etməyi planlaşdırır.
“İrəvandakı həmkarlarımız bunu təsdiqləməyib”, - nazir erməni tərəfinin yanaşmasından şikayətlənib.