44 günlük Vətən müharibəsi başlayandan sonra Azərbaycana qarşı siyasi-diplomatik təzyiqlər də artmağa başladı. Azərbaycan Ordusu cəbhədə uğurlar qazandıqca bu təzyiqlər həndəsi silsilə ilə çoxalır, hətta təhdid səviyyəsinə qədər yüksəlirdi.

Sumqayit.tv xəbər verir ki, bunu Azərbaycanın xarici işlər naziri Ceyhun Bayramov İctimai Televiziyada yayımlanan “Təmas xətti” verilişində deyib.

Nazirin sözlərinə görə, həmin günlərdə Fransa Prezidenti Emmanuel Makron dəfələrlə telefon zəngi edərək Azərbaycanı təhdid edib.

“Fransa prezidenti deyirdi ki, siz dərhal dayanmalısınız. Əgər bu baş verməsə, biz Fransa olaraq Dağlıq Qarabağı tanıyacağıq. Dərhal da Azərbaycan Prezidentindən cavab almışdı ki, siz bunu edə bilərsiniz, amma bu bizim üçün heç nəyi dəyişməyəcək. Siz əmin ola bilərsiniz ki, Azərbaycan dərhal Fransa ilə bütün diplomatik münasibətləri kəsəcək”, – Ceyhun Bayramov bildirib.

Nazir qeyd edib ki, həmin dövrdə Prezident İlham Əliyevin qəti mövqeyi və siyasi iradəsi sayəsində Azərbaycan beynəlxalq təzyiqlərə baxmayaraq ərazi bütövlüyünü təmin edib.

8-11-2025, 09:30 10