Ermənistanın Baş naziri Nikol ölkənin yeni konstitusiyaya ehtiyac duyduğunu bir daha bəyan edib.

Sumqayit.tv xəbər verir ki, Paşinyan Konstitusiya Günü münasibətilə xalqa müraciətində bildirib ki, yeni əsas qanunun qəbulu hökumətin prioritet istiqamətlərindən biri olaraq qalır.

Onun sözlərinə görə, yeni konstitusiya yalnız hüquqi sənəd deyil, həm də Ermənistanın gələcək inkişafını müəyyənləşdirəcək mühüm sənəddir.

Baş nazir qeyd edib ki, hazırkı konstitusiya cəmiyyətdə və dövlət idarəçiliyində yaranan bütün problemlərin həlli üçün kifayət etmir. O vurğulayıb ki, vətəndaşın özünü dövlətin qurucusu kimi hiss etdiyi, hüquq və vəzifələrin aydın şəkildə müəyyən olunduğu yeni konstitusiyaya ehtiyac var.

Paşinyan əlavə edib ki, yeni konstitusiya dövlət institutlarının daha da güclənməsinə, ölkədə sabitliyin və uzunmüddətli inkişafın təmin edilməsinə xidmət etməlidir.

Qeyd edək ki, Ermənistan konstitusiyasının dəyişdirilməsi Azərbaycanla sülh prosesində rəsmi Bakının irəli sürdüyü əsas şərtlərdən biri kimi qiymətləndirilir.