Rusiya Federasiyasının Azərbaycandakı fövqəladə və səlahiyyətli səfiri Mixail Yevdokimov Azərbaycan Respublikasının Xarici İşlər Nazirliyinə (XİN) çağırılıb.

Sumqayit.tv xəbər verir ki, bu barədə XİN məlumat yayıb.

Bildirilib ki, görüş zamanı iyulun 5-i axşam saatlarında Ukraynanın Mıkolayiv vilayətində yerləşən SOCAR-a məxsus yanacaqdoldurma məntəqəsinə dron hücumu ilə bağlı Rusiya tərəfinə kəskin etiraz bildirilib və müvafiq nota təqdim olunub.

XİN qeyd edib ki, bu, SOCAR-ın Ukraynadakı obyektlərinə qarşı ilk hücum deyil. Bundan əvvəl qazpaylayıcı kompressor stansiyası və Odessa şəhərində yerləşən neft bazası da hərbi zərbələrə məruz qalıb. Hücumlar nəticəsində şirkətə ciddi maddi ziyan dəyib, əməkdaşlar arasında yaralananlar olub.

Məlumatda vurğulanıb ki, dəfələrlə edilən xəbərdarlıqlara baxmayaraq, bu cür halların davam etməsi hücumların məqsədyönlü xarakter daşıdığına işarə edir.

Görüş zamanı Azərbaycanın Kiyevdəki səfirliyi və Xarkov şəhərində fəaliyyət göstərən Fəxri Konsulluğun binalarının da bir neçə hava zərbəsi nəticəsində zərər gördüyü diqqətə çatdırılıb. Diplomatik və konsulluq nümayəndəliklərinin toxunulmazlığının təmin edilməsinin Vyana Konvensiyaları çərçivəsində beynəlxalq öhdəlik olduğu xatırladılıb.

Sonda Rusiya tərəfi baş vermiş bütün hadisələrin hərtərəfli araşdırılmasına, rəsmi izahat verilməsinə, eləcə də mülki obyektlərin və diplomatik nümayəndəliklərin təhlükəsizliyi ilə bağlı beynəlxalq öhdəliklərə əməl etməyə çağırılıb.

6-07-2026, 16:28 73