Sabah Vətən müharibəsinin şəhidləri Məmmədov Ruslan və Əliyev Səmidin anım günü keçiriləcək.  
Sumqayit.tv xəbər verir ki, Məmmədov Ruslanın anma mərasimi Şəhidlər xiyabanında şəhidimizin məzarını ziyarət edərək başlayacaq, 11:30-da yaşadığı binada barelyefin açılışı olacaq, tədbir mərasim evində davam edəcək. 
Əliyev Səmidin anma mərasimi isə Şəhidlər xiyabanında şəhidimizin məzarını ziyarət edərək başlayacaq, sonra isə yaşadığı evdə davam edəcək. 
Qeyd edək ki, Ruslan Məmmədov 1997-ci il iyunun 6-da Sumqayıt şəhərində anadan olub. Azərbaycan Ordusunun leytenantı olan Ruslan Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Tərtər rayonunun Suqovuşan qəsəbəsinin azadlığı uğrunda gedən döyüşlərdə savaşıb. Ruslan Məmmədov noyabrın 1-də Ağdərə istiqamətində şəhid olub.

Səmid Əliyev 1998-ci il iyun ayının 5-də Coratda anadan olub. 3 bacının bir qardaşı idi. Nişanlı idi. 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Səmid Əliyev Füzuli döyüşlərində savaşıb. Səmid Əliyev 1 oktyabrda Füzuli rayonu uğrunda döyüş tapşırığını yerinə yetirərkən şəhid olub. Ruhunuz şad olsun!