Bugün şəhidimiz Verdiyev İsax Ədalət oğlunun anım mərasimi keçirilib. 
Sumqayit.tv xəbər verir ki, mərasim şəhidimizin məzarının Şəhidlər xiyabanında ziyarət olunması ilə başlayıb, daha sonra isə yaşadığı evdə davam edib. Mərasimdə şəhidimizin ailəsi, qohumları və dostları, qazilər, Azərbaycan Dövlət İqtisad Universitetinin tələbə və müəllim kollektivi, İcra hakimiyyəti nümayəndələri, 4-cü bölmənin rəisi və şəxsi heyəti və digər şəhid valideynləri iştirak edib.
Qeyd edək ki, şəhidimiz Verdiyev İsax Ədalət oğlu 1997-ci il sentyabrın 21-də Rusiyanın Kalininqrad şəhərində anadan olub. 5 dil bilən İsax İqtisad Universitetində oxuyarkən savadına görə 1 illik Türkiyədə təhsil almağa göndərilib. Azərbaycan Ordusunun əsgəri olan İsax Verdiyev 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı könüllü olaraq Füzulinin azadlığı uğrunda gedən döyüşlərdə savaşıb. 06.10.2020-ci ildə Füzuli rayon istiqamətində düşmən üzərinə hücuma keçərkən şəhid olub. 
Ruhun şad olsun, İgid!