Sumqayıt Apellyasiya Məhkəməsində intihara cəhd hadisəsi olub.
Sumqayit.tv Lent.az-a istinadən xəbər verir ki, bu barədə vəkil Elçin Sadıqov məlumat paylaşıb. Onun sözlərinə görə, hadisə bir neçə dəqiqə əvvəl baş verib.
Belə ki, İnzibati Xətalar Məcəlləsinin 528-ci (Məhkəmə və digər orqanların qərarlarının icrası ilə əlaqədar icra məmurunun tələblərinin yerinə yetirilməməsi) maddəsilə barəsində icraat aparılan Əliyeva Günay Aqil qızı hakim Rəşadət Ağayevin qərarına etiraz edərək, hər iki qolunu ülgüclə dərindən kəsib.
Məlumata görə, G. Əliyeva barəsində Abşeron rayon Məhkəməsi 1000 manat cərimə təyin etmişdi. Sumqayıt Apellyasiya Məhkəməsi isə həmin qərarı dəyişərək, qadın barəsində 10 gün müddətinə inzibati həbs cəzası verib.