Gəncə Apellyasiya Məhkəməsində quldurluqda təqsirləndirilən Rasim Tağıyev, Kənan Abbasov və Ramin Sadıqovun barələrindəki hökmdən verilən apellyasiya şikayəti üzrə məhkəmə iclası başa çatıb.
Sumqayit.tv-in əldə etdiyi məlumata görə, hakim Nural Əliyevin sədrliyi ilə keçirilən prosesdə qərar elan olunub. Qərara əsasən, onların apellyasiya şikayəti təmin edilməyib.
Qeyd: 2021-ci il sentyabrın 20-i gecə saatlarında, Türkiyə Respublikasının vətəndaşı Rəcəb Pəhlivan Mustafa Daxili İşlər Nazirliyinin (DİN) “102 Zəng Mərkəzi” Xidmətinə müraciət edərək idarə etdiyi yük avtomobili ilə Bakı şəhəri istiqamətində hərəkətdə olan zaman tanımadığı şəxslərin onu saxladaraq deşici alətlə hədələyib 428 manat nağd pulunu quldurluq yolu ilə ələ keçirdiyini deyib. Gəncə şəhər Baş Polis İdarəsinin və Kəpəz rayon Polis İdarəsinin əməkdaşlarının birgə keçirdikləri əməliyyat-axtarış tədbirləri nəticəsində quldurluq hadisəsini törətməkdə şübhəli bilinən şəxslər saxlanılıb. Araşdırmalar nəticəsində məlum olub ki, Ağstafa rayon Qırlı kənd sakini, əvvəllər soyğunçuluq əməlinə görə məhkum olunmuş Rasim Tağıyev, həmyerlisi Kənan Abbasov və tanışı, Sumqayıt şəhər sakini Ramin Sadıqov ilə birlikdə sonuncuya məxsus “Mercedes” markalı avtomobil ilə yük avtomobilində hərəkətdə olan, Rəcəb Pəhlivan Mustafanı texniki nasazlıq bəhanəsi ilə işarə edərək saxladıblar. Daha sonra K. Abbasov əlindəki vintaçan ilə onu öldürəcəyi ilə hədələyən zaman R.Tağıyev onun cibindən 420 manat nəğd pulu götürərək oradan uzaqlaşıblar. Şübhəli şəxslər saxlanılaraq maddi sübutlarla birlikdə istintaqa təhvil verilib. Gəncə Ağır Cinayətlər Məhkəməsinin hökmü ilə Rasim Tağıyevlə Kənan Abbasov 9 il, digəri isə 8 il müddətinə azadlıqdan məhrum edilib.